Boqolaal dadweyne ah oo ay horkacayaan culimaa’udiinka waaweyn ee Soomaaliyeed, ayaa Talaadadi isugu soo baxay fagaaraha Daljirka Dahsoon ee magaalada Muqdisho, iyagoo dhigaya bannaanbax ballaaran oo looga soo horjeedo wax ay ku tilmaameen "xadgudubka iyo faragelinta Israa’iil" ee ka dhanka ah midnimada Soomaaliya.
Dibadbaxan, oo saameyn weyn ku yeeshay isu-socodka qeybo kamid ah caasimadda, ayaa waxaa soo qaban-qaabiyay Midowga Golayaasha Culimada Soomaaliyeed.
Waxaa kasoo qeyb-galay mas’uuliyiin ka tirsan maamulka Gobolka Banaadir, ururrada bulshada rayidka, iyo kumanaan shacab ah oo watay boorar ay ku qoran yihiin halku-dhigyo ay ku diidan yihiin xiriirka Israa’iil.
Digniinta Culimada
Guddoomiyaha Midowga Golayaasha Culimada Soomaaliyeed, Sheekh Suufo Yare, oo la hadlayay dadweynihii isugu soo aruuray fagaaraha, ayaa sheegay in ujeeddada isu-soo-baxani ay tahay mid lagu muujinayo mowqifka adag ee culimada iyo shacabka.
"Culimada Soomaaliyeed maanta waxay sameynayaan bannaanbax isugu jira socod dheer iyo isu-imaatin, si aan u muujinno mowqifka culimada ee ah ilaalinta midnimada ummadda," ayuu yiri Sheekh Suufo.
Dhanka kale, Sheekh Bashiir Axmed Salaad, oo ah Guddoomiye ku-xigeenka midowga culimada, ayaa cod dheer ku sheegay inaysan jirin wax walaaltinimo ah oo kala dhexeeya Israa’iil.
"Haddaan nahay Islaam, walaalo ma nihin Yuhuuda, mana yeeli doono in nagula soo xadgudbo," ayuu yiri Sheekh Bashiir oo dadweynaha u khudbeynayay.
Midnimada Dalka iyo Eedeymaha Loo Jeediyay Israa’iil
Intii uu socday bannaanbaxa, culimada ayaa si weyn uga digay qorshayaal ay sheegeen in Israa’iil ay ku dooneyso in ay ku kala qeybiso dhulka Soomaaliya.
Sheekh Cali Wajiis, oo kamid ah culimada caanka ah, ayaa yiri: "Culimada Soomaaliyeed saaka waxay iskugu soo baxeen in ay dadka ka wacyi-geliyaan dhagarta Israa’iil ay la damacsan tahay kala goynta dalka."
Hadalkan ayaa imaanaya xilli ay jirto dareen shacab oo kacsan, iyadoo Sheekh Yuusuf Cali Ceynte uu isna ugu baaqay madaxda iyo shacabka inaysan u kala harin difaaca qaranimada.
"Maanta oo kale, madax, culimo iyo shacab waxaa la gudboon in aysan u kala harin ka hortagga burburka ay nala damacsan tahay Israa’iil," ayuu yiri Sheekh Ceynte.
Sidoo kale, Sheekh Cabdullaahi Axmed ayaa carrabka ku adkeeyay in shacabka Soomaaliyeed aysan marnaba aqbali doonin in lagu xadgudbo midnimada dhulkooda.
Bannaanbaxan ayaa kusoo idlaaday jawi nabdoon, iyadoo fariinta ugu weyn ee laga dheehan karay ay ahayd mid ku baaqaysa midnimo iyo feejignaan ka dhan ah faragelin shisheeye.
