Weeraradii ugu dambeeyay ayay Israa'iil ku beegsatay shakhsiyaad sarsare oo isugu jira siyaasiyiin iyo saraakiil ciidan oo Iiraaniyiin ah, oo ay ka mid yihiin Hoggaamiyaha Ruuxiga ah Cali Khamenei iyo Madaxweyne Masoud Pezeshkian, sida ay Sabtidii tabisay warbaahinta Maraykanka ee Axios.
Masuul sare oo Maraykan ah ayaa u xaqiijiyay wakaaladda wararka in Israa'iil ay fulisay duqeymo xagga cirka ah oo ka dhan ah taliyeyaal iyo hoggaamiyeyaal siyaasadeed oo sarsare oo u dhashay Iiraan.
Telefishinka Channel 12 ee Israa'iil ayaa weriyay in qiimeyn lagu sameeyay Tel Aviv ay muujisay in ay u badan tahay in la dilay Cali Shamkhani, oo ah la-taliyaha Khamenei ee u qaabilsan barnaamijka nukliyeerka Iiraan.
Wasaaradda Arrimaha Dibadda ee Iiraan ayaa si degdeg ah uga jawaabtay qaar ka mid ah warbixinnadaas, iyadoo sheegtay in Wasiirka Arrimaha Dibadda, Abbas Araghchi, uu caafimaad qabo.
Ilaa iyo hadda, mas'uuliyiinta Iiraan ma aysan soo saarin wax xaqiijin rasmi ah oo ku saabsan wax dhimasho ah oo ka dhalatay weeraradaas.
Israa'iil iyo Maraykanka ayaa horraantii Sabtida ku dhawaaqay howlgal wadajir ah oo ka dhan ah Iiraan, iyagoo sabab uga dhigay "khataraha" ka imaanaya "maamulka Iiraan."
Weeraradan ayaa imanaya xilli ay socdeen wadahadalo u dhexeeya Washington iyo Tehran oo ku saabsan barnaamijka nukliyeerka Iiraan, kuwaas oo ay dhex-dhexaadinaysay dowladda Cumaan.
Wareeg cusub oo wadahadalo ah oo ka dhacay magaalada Geneva ayaa soo gaba-gaboobay maalintii Khamiista.
Bishii Juun ee la soo dhaafay, Maraykanka ayaa garaacay saddex xarumood oo ah kuwa nukliyeerka Iiraan, intii uu socday dagaalkii 12-ka maalmood qaatay ee u dhexeeyay Israa'iil iyo Iiraan.
