Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa jeediyay khudbad xasaasi ah oo uu kaga jawaabayay tallaabooyin uu ku tilmaamay "duullaan qaawan" oo Israa’iil ay kusoo qaadday madaxbannaanida Soomaaliya, isagoo digniin culus u diray Ra’iisul Wasaaraha Israa’iil, Benjamin Netanyahu.
Madaxweynaha oo ka hadlayay xaaladda siyaasadeed ee dalka iyo damaca Israa’iil ee ku aaddan gobollada Waqooyi (Somaliland), ayaa si adag u sheegay in dowladda iyo shacabka Soomaaliyeed aysan marnaba aqbali doonin faragelin shisheeye oo lagu kala dhantaalayo midnimada dhuleed ee dalka.
"Aqoonsiga Netanyahu waa waxba kama jiraan"
Madaxweyne Xasan Sheekh ayaa sheegay in aqoonsiga la sheegay in Israa’iil ay siisay Somaliland uusan ahayn mid sharci ah, balse uu yahay qorshe ay Israa’iil ku doonayso dhul ay saldhigyo ka sameysato.
"Waxaan markale caddeynayaa in Jamhuuriyadda Federaalka Soomaaliya ay tahay dal xor ah, mid ah, dhulkiisa aan lagu kala goyn karin warqad ay Israa'iil qortay ama uu saxiixay Netanyahu, oo isagaba eedaysane caalamka ka ah," ayuu yiri Madaxweynaha.
Wuxuu intaas ku daray in ujeeddada Israa’iil aysan ahayn danta dadka ku nool Waqooyiga Soomaaliya, balse ay tahay dano istiraatiijiyadeed oo ay ku doonayso inay saldhigyo milateri kaga sameysato Geeska Afrika iyo Badda Cas, taas oo uu sheegay inay qalqalgelinayso amniga gobolka.
Baaqa ku socda Somaliland iyo Walaaca Xasuuqa Gaza
Isagoo la hadlayay maamulka iyo shacabka Somaliland, Madaxweynaha ayaa xusuusiyay dhibaatooyinka bini'aadanimo ee Israa'iil ka waddo marinka Gaza, wuxuuna uga digay inay qayb ka noqdaan qorsheyaasha maamulka Netanyahu.
"Haddii dadka Soomaaliyeed ay la seexan waayeen waxa Netanyahu ku sameynayo shacabka Reer Falastiin... ma filayo in shacabka Hargeysa ay aqbalayaan in looga alalaaso dalkeenna taliskaas ku caan baxay xasuuqa shacab masaakiin ah," ayuu yiri Madaxweyne Xasan.
Madaxweynaha ayaa ugu baaqay Somaliland inay wada-hadal ku raadiyaan xalka, isagoo tusaale u soo qaatay dalalka sida South Sudan iyo Eritrea oo ku kala go'ay heshiis siyaasadeed, balse aan lagu kala tegin aqoonsi shisheeye oo garab maraya dowladda dhexe (Mother Country).
Madaxweyne Xasan Sheekh ayaa khudbaddiisa ku bogaadiyay mowqifka dowladaha caalamka ee garab istaagay midnimada Soomaaliya. Waxa uu si gaar ah carrabka ugu dhuftay Madaxweynaha Mareykanka Donald Trump.
"Waxaan si gaar ah ugu mahadcelinayaa dowladda Mareykanka iyo madaxweyneheeda Donald Trump, garab-istaagga ay Soomaaliya ku garab istaageen ilaalinta waxa ay xaqa u leedahay," ayuu yiri Madaxweynaha.
Wuxuu sidoo kale u mahadceliyay Qaramada Midoobay, Midowga Afrika, Jaamacadda Carabta, iyo Ururka Iskaashiga Islaamka oo uu sheegay inay difaaceen jiritaanka Soomaaliya.
Ugu dambeyntii, Madaxweynaha ayaa farriin kama dambays ah u diray madaxda Israa’iil, isagoo u sheegay in Soomaaliya aan la qabsan karin, lana kala iibsan karin.
"Ogow, Soomaaliya Soomaali baa leh, iyadaana u tashanaysa," ayuu khudbaddiisa kusoo xiray Madaxweyne Xasan Sheekh Maxamuud.
