Hannaanka doorashada golaha deegaanka ee gobolka Banaadir ayaa qaaday tallaabo muhiim ah, kadib markii ururro siyaasadeed dhowr ah ay si rasmi ah ugu wareejiyeen Guddiga Madaxa Bannaan ee Doorashada iyo Soohdimaha (NIEBC) liisaskooda musharrixiinta.
Munaasabad rasmi ah oo ka dhacday Muqdisho ayaa guddigu ku guddoomay liisaska tartamayaasha u sharaxan doorashada deegaanka ee ku imaanaysa “hal qof, hal cod”. Ururrada siyaasadeed ee maanta ku wareejiyay faylasha musharrixiintooda waxaa ka mid ah: Urur Siyaasadeedka Ramaas, Urur Siyaasadeedka Karaama, Ururka Urur Siyaasadeedka Somali Unity Saab iyo Urur Siyaasadeedka Cadaaladda iyo Wadajirka
Geeddi-socodkan gudbinta liisaska ayaa ka mid ah talaabooyinka muhiimka ah ee guddigu uga gol leeyahay in doorashadu u dhacdo si hufan, si habsami leh, isla markaana waafaqsan jadwalkii hore loo shaaciyay. Tallaabadani waxay muujinaysaa diyaar-garowga ururradan siyaasadeed ee ku aaddan ka qaybgalka habraaca dimuqraadiyadda iyo u tartamidda maamulka degmooyinka caasimadda.
Waxaa hadlay Guddoomiyaha NIEBC, Mudane Cabdikariin Axmed Xasan, oo bogaadiyay ururrada buuxiyay shuruudaha. Wuxuu xusuusin adag u diray ururrada siyaasadeed ee aan weli dhammaystirin dukumiintiyadooda.
Guddoomiye Cabdikariin ayaa carrabka ku adkeeyay in wakhtiga gudbinta uu si degdeg ah u xirmayo, isaga oo ku boorriyay dhammaan ururrada harsan inay ku soo gudbiyaan liisaskooda musharrixiinta ka hor wakhtiga kama-dambeysta ah ee 10-ka December. Guddigu wuxuu ku celiyay in u hoggaansanaanta jadwalkan ay muhiim u tahay daabacaadda waqtigeeda ee warqadaha codbixinta iyo guusha howlaha abaabulka doorashadan taariikhiga ah.
