Wasiirka Kalluumeysiga iyo Dhaqaalaha Buluugga ah ee Dowladda Federaalka Soomaaliya, Mudane Axmed Xasan Aadan, ayaa maanta dhammeystiray heshiis muhiim ah oo uu la saxiixday shirkadda Turkiga laga leeyahay ee OYAK. Munaasabadda saxiixa oo ka dhacday magaalada Ankara ayaa si rasmi ah u dhaqan-gelisay iskaashiga Horumarinta Wax-soosaarka Badda, kaas oo ujeedkiisu yahay ilaalinta iyo ka faa’iideysiga kheyraadka badda ee dalka.
Wasiirka ayaa xarunta OYAK ku qaabilay Wasiirka Gaashaandhigga TURKIGA, taasoo muujinaysa heerka sare ee wadahadallada. Intii ay socotay munaasabadda, Wasiir Axmed Xasan Aadan ayaa faahfaahiyay muhiimadda istiraatiijiga ah ee iskaashigan, isagoo xusay in uu horseedi doono maalgelin toos ah oo lagu sameeyo kaabeyaasha dhaqaalaha buluugga ah ee Soomaaliya.
Heshiiska ayaa diiradda saaraya ballaarinta wax-soosaarka kalluunka si uu u buuxiyo heerarka suuqyada caalamiga ah, dhismaha warshado maxalli ah oo lagu farsameeyo kalluunka, iyo horumarinta xirfadaha farsamo ee kalluumeysatada Soomaaliyeed. Hindisahan ayaa la filayaa inuu casriyeeyo waaxda kalluumeysiga isla markaana ku xiro badeecadaha Soomaaliya silsiladda sahayda caalamiga ah.
Heshiiska oo ay goobjoog ka ahaayeen Wasiirka Dekedaha iyo Gaadiidka Badda ee Soomaaliya, Mudane Cabdulqaadir Maxamed Nuur, iyo Agaasimaha Guud ee Wasaaradda Kalluumeysiga, Mudane Cabdi Dirshe, ayaa mudnaan gaar ah siinaya amniga badda. Waxa kale oo uu ka kooban yahay tallaabooyin adag oo lagula dagaallamayo kalluumeysiga sharci-darrada ah, iyadoo lagu talagalay in la abuuro kumannaan fursado shaqo ah oo si gaar ah ay uga faa’iideysan doonaan dhalinyarada iyo bulshooyinka ku nool xeebaha.
Wasiir Axmed Xasan Aadan ayaa ammaanay dowladda Turkiga iyo shirkadda OYAK kalsoonida ay ku qabaan xasilloonida sii kordheysa ee Soomaaliya, isagoo xusay in maalgelintan ballaaran ay caddeyn u tahay soo kabashada dalka iyo soo jiidashada shirkadaha caalamiga ah ee dhinacyada horumarinta dhaqaalaha iyo shaqo-abuurka.
Dhankooda, madaxda ka socday wasaaradaha Gaashaandhigga, Beeraha iyo Daaqa, iyo Arrimaha Dibadda ee Turkiga, iyo sidoo kale maamulka sare ee OYAK, ayaa muujiyay muhiimadda istiraatiijiga ah ee heshiiska. Waxay ugamahadceliyeen dowladda Soomaaliya kalsoonida ay siisay qorshayaasha maalgelinta ee Turkiga, iyagoo xaqiijiyay in mashaariicdan ay sii xoojinayaan xiriirka taariikhiga ah iyo walaaltinimo ee ka dhexeeya labada dal.
