Turkiga ayaa soo bandhigay "ballanqaad xooggan" oo ku aaddan nabadda gobolka iyo xasilloonida dhaqaalaha caalamka intii lagu guda jiray shirweynihii G20 ee ka dhacay Koonfur Afrika, sida uu sheegay Madaxa Isgaarsiinta Madaxtooyada Turkiga, Burhanettin Duran.
Duran ayaa bartiisa NSosyal ku sheegay in Madaxweyne Recep Tayyip Erdogan uu si wax-ku-ool ah u gudbiyay aragtida Ankara intii lagu guda jiray fadhiyada shirweynaha, shirarka saxaafadda iyo kulammada laba-geesoodka ah, isaga oo ka hadlay iskaashiga difaaca, ganacsiga, tamarta, tiknoolajiyada iyo duulista.
Duran ayaa xusay saameynta diblomaasiyadeed ee Turkiga oo sii kordheysa iyo sida Erdogan uga hadlay xaaladda bani'aadantinimo ee Qaza iyo baahida loo qabo tallaabo caalami ah.
Wuxuu intaa ku daray in la adkeeyay hab-dhaqanka dhisidda nabadda ee Turkiga uu ku wajahay dagaalka Ukraine iyo Ruushka, iyo baaqyadiisa ku saabsan in la helo dhaqaale caalami ah oo ka midaysan oo loo wada siman yahay.
Turkiga oo martigelin doona COP31
Duran ayaa carrabaabay in Turkigu uu martigelin doono shir-madaxeedka isbeddelka cimilada ee Qaramada Midoobay, COP31, bisha Nofembar ee sannadka dambe.
Wuxuu sheegay in Turkiga uu yahay dal hoggaamiye ka ah tallaabooyinka cimilada, isagoo tusaale u soo qaatay yoolka ka takhalusidda dikhowga qiiqa, Net Zero Emissions 2053, iyo mashruuca Dhaqdhaqaaqa Baabi’inta Qashinka, Zero Waste Movement, kuwaas oo muujinaya ka-go’naanshaha dalka ee horumarka waara.
"Yoolka Net Zero Emissions 2053 ee ay hormuudka u tahay Marwada Madaxweynaha, Emine Erdogan, wuxuu u muujinayaa dunida in Turkigu qaatay hab-horumarineed tixgelinaya maanta iyo mustaqbalkaba. Aragtiyadan, oo mudnaanta siisay isbeddelka cagaaran ee dhammaan siyaasadaha — laga bilaabo tamarta ilaa gaadiidka, qorshaynta magaalooyinka ilaa waxsoosaarka — ayaa dhitay aasaas hoggaamineed oo xooggan oo loogu diyaargaroobayo COP31," ayuu yiri.
Wuxuu intaas ku daray: "Ololaha ka takhalusidda Qashinka, oo ay hoggaaminayso Marwo Emine Erdogan isla markaana isu beddelay dhaqdhaqaaq caalami ah oo deegaan, sidoo kale waa mid ka mid ah sheekooyinka guusha ee ugu dhiirigelinta badan si loo helo duni lagu wada noolaan karo. Yaraynta qashinka, isticmaalka hufan ee kheyraadka, iyo kor u qaadida dhaqanka ixtiraamka dabeecadda deegaanka ayaa ka mid ah ujeedooyinka si fiican ula jaanqaadaya COP31."
"Waxaan aaminsanahay in kulankan taariikhiga ah ee uu dalkayaga martigelin doono uu noqon doono geedi socod ay diblomaasiyadda cimiladu ka iftiinto Anatolia isla markaana xalal caalami ah ka soo yeeri doonaan Turkiga," ayuu intaa ku daray.
