Hay’adda Maareynta Masiibooyinka iyo Gurmadka Degdegga ah ee Turkiga (AFAD), Ururka Bisha Cas ee Turkiga (Kizilay), iyo Hay’adda Gargaarka Bani’aadamnimo ee Turkiga (IHH) ayaa gargaar bani’aadamnimo u diray magaalada Ayn Al Arab ee Suuriya si loo taageero shacabka ay saameeyeen iska horimaadyada socda.
AFAD iyo Kizilay ayaa Axaddii diray 11 gaari xamuul ah oo sida gargaar kuna wajahnaa Ayn Al Arab, iyagoo kaashanaya dowladda Suuriya iyo Xarunta Isku-duwidda Gargaarka ee Aleppo.
Shixnadda gargaarka ayaa isugu jirtay shan gaari oo wada 50 tan oo bur ah, hal gaari oo bustayaal sida, iyo shan gaari oo wada xafaayadaha carruurta iyo sahay cunto.
Dhanka kale, IHH ayaa lix gaari oo gargaar ah ka dirtay Aleppo kuna wajahnaa Ayn Al Arab, si ay u taageeraan shacabka la daalaa dhacaya cunto yari ka dhalatay colaadda iyo xaaladaha jiilaalka ee adag.
Gargaarkaasi waxaa ka mid ah bustayaal, furaashyo, go’do, xirmooyin cunto, rooti, cunto diyaarsan, kabo, iyo jaakado jiilaal.
Hay’adda samafalka ee Turkiga ayaa sheegtay in marin bani’aadamnimo loo furay Ayn Al Arab kaddib markii la kordhiyay xabbad-joojinta u dhexeysa dowladda Suuriya iyo kooxda argagixisada YPG, taas oo suurtagelisay in dib loo bilaabo gaarsiinta gargaarka.
Si kastaba ha ahaatee, xiisaddu way sii socotaa jiidda hore ee Ayn Al Arab inkastoo xabbad-joojinta.
Ciidanka Suuriya ayaa Talaadadii galay magaalada Sarrin ee jiidda Ayn Al Arab kaddib iska horimaadyo xooggan.
Axaddii, Wakaaladda Wararka Suuriya (SANA) ayaa sheegtay in hoobiye laga soo tuuray deegaan ay YPG ka taliso oo ku yaalla Ayn Al Arab uu ku dhacay iridda tuulada Al Jamal ee miyiga Jarabulus.
Difaaca Rayidka Suuriya ayaa sheegay in gantaal ay YPG soo ridday uu sidoo kale ku dhacay guri ku yaalla tuulada Al Hawi, oo ku taalla galbeedka Webiga Furaat ee miyiga Aleppo.
Weerarradan ayaa yimid hal maalin kaddib markii dowladda Suuriya ay Sabtidii ku dhawaaqday inay 15 maalmood ku kordhisay xabbad-joojinta ay la gashay YPG.
