Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa soo xiray Shirweynaha 6-aad ee Hoggaanminta iyo Hal-abuurka Dhalinyarada Soomaaliyeed oo ku qabsoomay caasimadda Muqdisho, isagoo jeediyay khudbad isugu jirta dhiirigelin iyo rajogelin.
Isagoo la hadlayay boqolaal dhalinyaro ah, Madaxweynaha ayaa ku dhawaaqay in dalku qaaday tallaabo weyn oo uu uga gudbay xaaladihii adkaa. Wuxuu caddeeyay in “Soomaaliya horey u socotay oo cagta saartay waddadii horumarka iyo barwaaqada,” taas oo astaan u ah waa cusub oo xasillooni iyo koboc dhaqaale ah.
Madaxweynaha ayaa khudbaddiisa xoogga ku saaray kaalinta muhiimka ah ee dhalinyarada oo uu ku tilmaamay laf-dhabarta horumarka dalka. Wuxuu dhalinyarada ugu baaqay inay u diyaar garoobaan hoggaaminta, isagoo sheegay inay yihiin maskaxda iyo xoogga dib-u-dhiska dalka.
“Dalkeennu maanta wuxuu baahi weyn u qabaa hoggaaminta dhalinyarada,” ayuu yiri Madaxweyne Xasan Sheekh. “Sababtan awgeed, waxaan aaminsanahay inaad awood u leedahiin inaad waxyaabo waaweyn ka qabataan horumarka.”
Wuxuu ku dhiirrigeliyay dhalinyarada inay si firfircoon uga qaybqaataan mashaariicda horumarineed ee ka socda dalka oo dhan, isagoo xusay in hal-abuurka iyo hoggaamintu ay yihiin tiirarka dowladnimada casriga ah.
Xafladda soo xiritaanka waxaa ka soo qeyb galay wafdi heer sare ah oo ka kooban labada Aqal ee Baarlamaanka Federaalka, wasiirro, hay’adaha bulshada rayidka, iyo marti sharaf kale. Shirweynahan ayaa noqday madal muhiim ah oo dhalinyarada Soomaaliyeed loogu dhiirrigeliyay inay si toos ah uga qeyb qaataan arrimaha qaranka, isla markaana ay kaalin muuqata ka qaataan jihaynta istaraatiijiga ah ee dalka.
