Madaxweynaha Turkiga Recep Tayyip Erdogan ayaa madaxtooyada caasimadda Ankara kulan kula qaatay Guddoomiyaha Golaha Sare ee Suudaan, Abdel Fattah al-Burhan, iyagoo ka wada hadlay xiriirka laba geesoodka ah iyo dagaalka weli ka socda Suudaan, sida ay sheegtay Agaasinka Isgaarsiinta Turkiga.

Bayaan Khamiistii lagu daabacay barta X ee Agaasinka Isgaarsiinta Turkiga ayaa lagu sheegay in labada hoggaamiye ay ka wada hadleen xiriirka Turkiga iyo Suudaan, iyo sidoo kale horumarrada gobolka iyo kuwa caalamiga ah.

Intii uu socday kulanka, Madaxweyne Erdogan ayaa sheegay in Ankara ay doonayso inay sii ballaariso iskaashiga ay la leedahay Suudaan, gaar ahaan dhinacyada ganacsiga, beeraha, warshadaha difaaca iyo macdanta.

Erdogan ayaa ka digay in dagaalka ka socda Suudaan uu sababay mid ka mid ah masiibooyinka bani’aadannimo ee ugu waaweyn dunida, isagoo xusay in falal u dhigma dambiyo ka dhan ah bani’aadannimada ay ka dhaceen dalka, gaar ahaan gobolka Al-Fasher.

Wuxuu ku baaqay in la qaado “tallaabooyin dhab ah oo go’aan leh” si loo joojiyo dagaalka.

Madaxweynaha Turkiga ayaa sidoo kale sheegay in Turkiga ay taageerto nabadda, xasilloonida iyo ilaalinta midnimada dhuleed ee Suudaan, isagoo intaa ku daray in hadafku yahay in la gaaro xabbad-joojin lana dhiso nabad waarta oo dalka ka hirgasha.

Erdogan ayaa carrabka ku adkeeyay in Turkiga ay sii wadi doonto daboolidda baahiyaha shacabka Suudaan ee wajahaya dhibaato bani’aadannimo, iyada oo loo marayo gargaar bani’aadannimo.

Munaasabadda soo dhaweynta ayaa waxaa goobjoog ka ahaa Wasiirka Arrimaha Dibadda Turkiga Hakan Fidan, Wasiirka Gaashaandhigga Yasar Guler, Wasiirka Beeraha iyo Kaymaha Ibrahim Yumakli, Madaxa Sirdoonka Qaranka Ibrahim Kalin, Agaasimaha Isgaarsiinta Burhanettin Duran, Madaxa Warshadaha Difaaca Haluk Gorgun, iyo La-taliyaha Sare ee Arrimaha Dibadda iyo Amniga Akif Cagatay Kilic.