Dowladda Federaalka Soomaaliya ayaa guul diblomaasiyadeed oo weyn ka gaartay masraxa caalamka, kadib markii isbaheysi ballaaran oo ay ku mideysan yihiin in ka badan 20 waddan iyo Ururka Iskaashiga Islaamka (OIC) ay si wadajir ah ugu dhawaaqeen garab istaag buuxa oo ay u muujinayaan midnimada iyo qaranimada Soomaaliya.
War-murtiyeed wadajir ah oo ay soo saareen Wasiirrada Arrimaha Dibadda ee dalalka ugu tunka weyn dunida Islaamka iyo Carabta oo ay kamid yihiin Masar, Turkiga, Sacuudiga, Iran, Pakistan, iyo Qatar, ayaa farriin adag loogu diray Israa’iil, iyadoo loo caddeeyay in dunidu aysan marnaba aqbali doonin in lagu xadgudbo dhulka Soomaaliya.
Wasiirrada ayaa sheegay in tallaabadii uu mas’uulka Israa’iiliga ah ku tagay gobolka Somaliland 6-dii bishan Janaayo 2026 ay ahayd "xadgudub qaawan" oo ka dhan ah qaranimada Soomaaliya. Balse, nuxurka ugu weyn ee bayaanka ayaa ahaa ballan-qaadka ay dalalkan ku bixiyeen inay garab taagan yihiin Soomaaliya.
"Waxaanu xaqiijinaynaa taageerada aan la loodin karin ee aan u hayno madaxbannaanida, midnimada, iyo bedqabka dhuleed ee Jamhuuriyadda Federaalka Soomaaliya," ayaa lagu yiri bayaanka wadajirka ah.
Erayadan ayaa muujinaya in Soomaaliya aysan kali ku ahayn dagaalka ay kula jirto faragelinta shisheeye, iyadoo heshay kalsoonida dowladaha saameynta ugu weyn ku leh gobolka iyo caalamkaba.
Isbaheysigan caalamiga ah ayaa si adag uga digay in la dhiirrigeliyo ajandayaasha gooni-goosadka ah, iyagoo sheegay in arrintaasi ay sii hurinayso xiisadaha gobolka. Waxay si toos ah u dalbadeen in Israa’iil ay: Ixtiraamto midnimada qaranka Soomaaliyeed, iyo in si degdeg ah uga laabato aqoonsiga iyo tallaabooyinka sharci-darrada ah.
Dalalka saxiixay bayaankan ayaa sidoo kale bogaadiyay biseylka siyaasadeed ee dowladda Soomaaliya, iyagoo ku ammaanay sida nabadda ah ee ay u wajaheyso difaaca qaranimadeeda iyo u hoggaansanaanta shuruucda caalamiga ah.
"Waxaan sii wadi doonnaa inaan Soomaaliya ku garab istaagno tallaabo kasta oo diblomaasiyadeed iyo mid sharci ah oo ay ku ilaashanayso midnimadeeda," ayaa lagu soo gabagabeeyay war-murtiyeedka.
Tallaabadan ayaa loo arkaa mid "hiil qaran" ah, taasoo meesha ka saaraysa damaca Israa’iil, isla markaana xoojinaysa mowqifka dowladda Soomaaliya ee ah in dalku yahay mid aan kala qeybsami karin.
