Wasiir-dowlaha Wasaaradda Isgaarsiinta iyo Teknolojiyadda Soomaaliya, Axmed Diri, ayaa kulan kula yeeshay Wasiirka Isgaarsiinta iyo Teknolojiyadda Macluumaadka ee Qatar, Maxamed bin Cali Al-Mannai, intii lagu jiray shirweynaha Mobile World Congress (MWC) Doha 2025. Kulanka ayaa diiradda lagu saaray xoojinta iskaashiga laba geesoodka ah ee dhinaca dhijitaalka.
Kulanka ayaa lagu falanqeeyay ballaarinta iskaashiga gaar ahaan dhanka dijitaaleynta adeegyada dowladda, horumarinta kaabayaasha ICT-ga, iyo xoojinta awoodaha amniga internetka (cybersecurity) si loo ilaaliyo nidaamyada qaranka xilli tiknoolajiyadu si degdeg ah u horumareyso.
Wasiir-dowlaha ayaa qaybta Qatar uga warbixiyay horumarka ay Soomaaliya ka samaysay casriyeynta adeegyada dadweynaha iyo dadaallada dowladda ee ku aaddan dhismaha nidaam dhijitaal oo mideysan, kaas oo u sahlaya muwaadiniinta inay si fudud oo hufan u helaan adeegyada muhiimka ah.
Dhankiisa, Wasiirka Isgaarsiinta iyo Teknolojiyadda ee Qatar ayaa muujiyey in dowladdiisa ay diyaar u tahay taageeridda barnaamijyada adeegyada dowladda ee dhijitaalka ah, tababarrada xirfadeed ee shaqaalaha dowladda, iyo horumarinta adeegyada isgaarsiinta casriga ah. Wuxuu mar kale xaqiijiyay ka go’naanshaha Qatar ee taageeridda qorshayaasha Soomaaliya ee isbeddelka dhijitaalka ah.
Kulanka waxaa lagu soo gabagabeeyay heshiis ku saabsan in la dedejiyo oo la ballaariyo hawlaha iskaashiga wadajirka ah si loo taageero mustaqbalka dhijitaalka ah ee Soomaaliya.
