Guddoomiyaha Golaha Sare ee Suudaan, Abdel Fattah al-Burhaan, ayaa Khamiistii ballanqaaday in dagaalka lagaga adkaan doono ciidamada sida milateriga u hubeysan ee RSF, isagoo sheegay in albaabka dib-u-heshiisiinta qaran uu weli furan yahay.

“Waxaan dadkeenna meel kasta oo ay joogaan u xaqiijinaynaa in guushu soo socoto, isla markaana guushu ay noqon doonto mid ay leeyihiin shacabka Suudaan,” ayuu Burhaan ku yiri khudbad uu ka jeediyay munaasabadda 70-aad ee xuska madax-bannaanida Suudaan, sida ay werisay wakaaladda wararka ee dowladda, SUNA.

“Waxaan sidoo kale xaqiijinaynaa in albaabka dib-u-heshiisiinta qaran uu weli u furan yahay,” ayuu raaciyay.

Burhaan ayaa sheegay in dagaalku mideeyay shacab weynaha Suudaan isla markaana uu xoojiyay go’aankooda qaran, isagoo u xaqiijiyay dadka ku nool gobollada Darfur iyo Kordofaan in guushu ay soo dhowdahay.

Wuxuu sidoo kale ammaanay xoogagga siyaasadeed ee garab istaagay ciidamada, isagoo carrabka ku adkeeyay in dib-u-heshiisiinta qaran ay u furan tahay dhammaan kuwa doonaya inay ku biiraan.

Suudaan ayaa tan iyo bishii Abriil 2023 ku jirta dagaal xooggan oo u dhexeeya ciidamada dowladda iyo RSF, kaas oo sababay dhimashada kumannaan qof iyo barakaca malaayiin kale.

Saddexda gobol ee Kordofaan — Waqooyi, Galbeed iyo Koonfur — ayaa toddobaadyo ay ka socdeen dagaallo culus oo u dhexeeya ciidamada iyo RSF, taas oo ku qasabtay tobannaan kun oo qof inay ka qaxaan guryahooda.

18-ka gobol ee Suudaan, RSF waxay gacanta ku haysaa dhammaan shanta gobol ee Darfur ee galbeedka dalka, marka laga reebo qaybo ka mid ah Waqooyiga Darfur oo weli ay maamulaan ciidamada dowladda. Dhanka kale, ciidanka Suudaan ayaa gacanta ku haya inta badan 13-ka gobol ee kale ee koonfurta, waqooyiga, bariga iyo bartamaha dalka, oo ay ku jirto caasimadda Khartoum.