Midowga Afrika (AU) ayaa Sabtidii ku dhawaaqay in Guinea-Bissau si degdeg ah looga joojiyay ka qaybgalka dhammaan hawlaha midowga ilaa dib loo soo celiyo nidaamka dastuuriga ah.
Go’aanka Guddiga Nabadda iyo Amniga ee AU ayaa yimid labo maalmood kadib markii militarigu ay ku dhawaaqeen in ay xilka ka tureen Madaxweynihii dalkaas, Umaro Sissoco Embaló.
Guddigu wuxuu si adag u cambaareeyay afgambigii militariga ee dhacay 26-kii Nofembar, isagoo ku tilmaamay beddel-dowladeed oo aan dastuuri ahayn oo ka hor imanaya qawaaniinta AU, wuxuu dalbaday in si shuruud la’aan ah loo sii daayo saraakiisha doorashada iyo siyaasiyiinta la xiray.
Guddigu wuxuu ugu baaqay ururada ECOWAS, CPLP, Qaramada Midoobay iyo bahwadaagta kale inay taageeraan soo celinta degdegga ah ee dowladnimada dastuuriga ah ee dalka yar ee Galbeedka Afrika.
Talis sare oo militariga ah oo isku magacaabay “Taliska Sare ee Militariga ee Soo Celinta Amniga Qaranka iyo Nidaamka Dadweynaha” ayaa Arbacadii sheegay inay “la wareegeen awoodaha dowladda,” isla markaana ay ka qaadeen Embaló xilkii madaxweynaha.
Afgambiga ayaa dhacay iyadoo labada dhinac—musharaxa madax-bannaan ee Fernando Dias iyo kooxda Embaló—ay ku kala dhawaaqeen guulo is khilaafsan intii la sugayay natiijooyinka rasmiga ah ee doorashadii 23-kii Nofembar.
Guddiga Nabadda iyo Amniga ee AU wuxuu militariga ugu baaqay inay oggolaadaan dhameystirka habka doorashada oo ay ixtiraamaan codka shacabka.
Afgambiga waxaa si xooggan u cambaareeyay Xoghayaha Guud ee Qaramada Midoobay Antonio Guterres iyo ECOWAS, oo Guinea-Bissau ka joojiyay dhammaan hay’adaha go’aan-qaadashada.
AU waxay taageertay go’aannada ECOWAS, waxayna uga digtay in cunaqabateyn lala beegsan doono hoggaanka militariga haddii ay sii wadaan faragelinta siyaasadda.
AU waxay komishankeeda ku amartay inuu xoojiyo shaqada wadajirka ah ee ECOWAS, inuu kordhiyo taageerada xasillinta, inuu ilaaliyo kormeerayaasha doorashada, isla markaana dhiso hannaan dabagal ah.
Embaló, oo isku dayayay inuu helo muddo madaxeed labaad, ayey militariga xireen, isagoo markii la sii daayay u cararay Senegal.
Wafdi sare oo ka socda ECOWAS oo ay hoggaaminayaan madaxweynayaasha Senegal, Cape Verde, iyo Sierra Leone ayaa la filayaa inay gaaraan Bissau dhammaadka toddobaadkan.
