Guddoomiyaha Guddiga Midowga Afrika ayaa Khamiistii ku baaqay in la is xakameeyo, ka dib markii in ka badan 400 oo rayid ah lagu dilay iska horimaadyo dhowaan ka dhacay gobolka Koonfurta Kivu ee bariga Jamhuuriyadda Dimuqraadiga ee Congo
Bayaan uu soo saaray, Guddoomiyaha Guddiga Midowga Afrika, Maxamuud Cali Yuusuf, ayaa ka muujiyay murugo rabshadaha lagula kacay dadka rayidka ah, isagoo ugu baaqay dhammaan dhinacyada ay khusayso inay muujiyaan is-xakameyn isla markaana mudnaanta siiyaan xal siyaasadeed.
Arrintan ayaa timid kadib markii Afhayeenka dowladda Koonfur Kivu, Bashizi-Didier Kabuya, uu Arbacadii sheegay in ka badan 413 qof oo ay ku jiraan haween, carruur iyo dhalinyaro lagu dilay rasaas, bambaanooyin iyo walxo qarxa, kuwaas oo ka dhacay deegaanno kala duwan oo ka tirsan dhulka Uvira.
Isla maalintaas, maleeshiyada M23 ayaa sheegtay inay la wareegeen magaalada Uvira, oo ah xarun ganacsi oo muhiim ah kuna dhow xadka Burundi, isla markaana horey u ahayd caasimad ku-meel-gaar ah oo gobolka Koonfur Kivu ah, kadib maalmo dagaal ah oo ay la galeen ciidamada dowladda.
Kumannaan qof oo barakacay
Qabsashada Uvira ayaa dhalisay xaalad bani’aadannimo oo ba’an, iyadoo in ka badan 200,000 oo qof lagu qasbay inay ka qaxaan guryahooda, sida uu sheegay Kabuya.
4-ta December, Madaxweynaha Congo Felix Tshisekedi iyo Madaxweynaha Rwanda Paul Kagame ayaa kala saxiixday heshiis nabadeed iyo mid dhaqaale oo lagu doonayo in lagu soo afjaro dagaallada ka socda bariga DR Congo.
Heshiiskan ayaa yimid kadib heshiis nabadeed oo uu dhexdhexaadiyay Madaxweynaha Mareykanka Donald Trump bishii Juun.
Guddoomiyaha Midowga Afrika ayaa sheegay in dagaallada iyo rabshadaha soo cusboonaaday ay “lid ku yihiin horumarkii” ka dhashay Heshiiska Doha Framework ee u dhexeeya DR Congo iyo AFC/M23, iyo sidoo kale heshiiska nabadeed ee ay Mareykanku dhexdhexaadiyeen ee ay kala saxiixdeen DR Congo iyo Rwanda.
Midowga Afrika oo cambaareeyay isku dayga dhismaha maamul kale
Yuusuf ayaa mar kale adkeeyay “mowqifka joogtada ah ee Midowga Afrika ee ah in nabad waarta oo ka dhalata gobolka Harooyinka Weyn ay ku xirantahay ixtiraamka buuxa ee madaxbannaanida iyo midnimada dhuleed ee dhammaan dowladaha.”
Wuxuu sidoo kale cambaareeyay isku day kasta oo lagu dhisayo maamul kale oo ka jira bariga DR Congo.
Dowladda DRC ayaa rabshadaha ka dhacay Uvira ku eedeysay “weerarro ballaaran oo maalmihii u dambeeyay ay qaadeen Ciidamada Difaaca Rwanda” kuwaas oo ka dhacay jihada Kamanyola–Uvira.
Bayaan ay Arbacadii soo saartay Wasaaradda Warfaafinta ayaa lagu sheegay in weerarradaasi ay yihiin “xadgudub cad” oo ka dhan ah xabbad-joojinta, ballanqaadyadii lagu galay heshiisyadii nabadeed ee u dambeeyay, iyo sidoo kale mabaadi’da aasaasiga ah ee sharciga bani’aadannimada caalamiga ah.
Maleeshiyada M23 ayaa dib u billowday dagaalka sannadkii 2021, iyadoo qaaday weerar degdeg ah oo horseeday inay la wareegto dhulal badan, oo ay ku jiraan caasimadaha gobollada Goma iyo Bukavu.
Qaramada Midoobay iyo dowladda Kinshasa ayaa ku eedeeya Rwanda inay taageerto M23, eedeymahaas oo Kigali ay marar badan beenisay.
