Madaxweynaha Mareykanka Donald Trump ayaa Sabtidii ku dhawaaqay in Mareykanku uu fuliyay weerar ballaaran oo ka dhan ah Venezuela, taasoo keentay in la qabto Madaxweynaha Venezuela Nicolas Maduro iyo xaaskiisa, kuwaas oo laga saaray dalka.
“Dowladda Mareykanka ayaa si guul leh u fulisay weerar ballaaran oo ka dhan ah Venezuela iyo hoggaamiyaha dalkaas, Madaxweyne Nicolas Maduro, kaas oo isaga iyo xaaskiisaba la qabtay loona qaaday meel ka baxsan dalka,” ayuu Trump ku yiri bayaan uu ku daabacay barta warbaahinta bulshada ee Truth Social.
Trump ayaa sheegay in duullaanka milatari lagu fuliyay “iskaashi lala yeeshay hay’adaha fulinta sharciga ee Mareykanka.”
Wuxuu sheegay in faahfaahin dheeraad ah la shaacin doono goor dambe, isla markaana shir jaraa’id lagu qaban doono 11:00 subaxnimo xaruntiisa Mar-a-Lago ee gobolka Florida ee Mareykanka.
Si gaar ah, wareysi taleefan oo kooban oo uu siiyay wargeyska New York Times (NYT), Trump ayaa ku amaanay guusha weerarka.
“Qorsheyn wanaagsan iyo ciidamo aad u heer sare ah, dad aad u fiican,” ayuu Trump u sheegay NYT.
“Runtii waxay ahayd hawlgal aad u xeel dheer,” ayuu raaciyay.
Markii wax laga weydiiyay in uu oggolaansho ka helay Congress-ka howlgalka ama waxa xiga ee ku saabsan Venezuela, Trump ayaa sheegay inuu arrimahaas kaga hadli doono shirka jaraa’id.
Maduro oo ku jira gacanta Mareykanka
Ku-xigeenka Xoghayaha Arrimaha Dibadda Mareykanka Christopher Landau ayaa sheegay in Maduro uu “ugu dambayn wajihi doono caddaaladda dambiyadiisa.”
“Waaber cusub oo u baryay Venezuela! Taliskii waa dhammaaday. Hadda—ugu dambayn—wuxuu wajihi doonaa caddaaladda dambiyadiisa,” ayuu ku yiri barta warbaahinta bulshada ee Mareykanka ee X.
Weerarradan ayaa yimid kaddib bilo xiisad ah, xilli Mareykanku uu ku eedeynayay Maduro inuu ku lug leeyahay ka ganacsiga daroogada.
Cutubka ciidamada gaarka ah ee Mareykanka ee Delta Force, oo ah unug ciidan oo heer sare ah, ayaa fuliyay hawlgalka lagu qabtay Maduro, sida ay werisay CBS News iyadoo soo xiganaysa saraakiil.
Senatarka Mareykanka Mike Lee ayaa sheegay in Xoghayaha Arrimaha Dibadda Marco Rubio uu u sheegay in Maduro la xiray si loogu maxkamadeeyo eedeymo dambiyeed oo ka jira Mareykanka.
Lee ayaa sheegay in Rubio uu “filayo inaysan jirin tallaabooyin kale oo laga qaadi doono Venezuela maadaama Maduro uu hadda ku jiro gacanta Mareykanka.”
Dhanka kale, Madaxweyne Ku-xigeenka Venezuela Delcy Rodriguez ayaa sheegtay in aysan “ka warqabin” halka uu ku sugan yahay Maduro, waxayna Trump ka dalbatay “caddeyn nololeed oo muujinaysa in Madaxweyne Maduro nool yahay.”
