Golaha Wasiirrada Dowladda Federaalka Soomaaliya ayaa Isniintii yeeshay kulan degdeg ah oo ay ku eegayeen guud ahaan xaaladda amniga dalka, howlgalladii milatari ee dhawaan ka dhanka ahaa kooxaha xagjirka ah, iyo guusha laga gaaray qabsoomidda doorashooyinka goleyaasha degmooyinka ee Gobolka Banaadir.

Kulanka waxaa shir-guddoomiyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, waxaana ka qayb galay Ra’iisul Wasaaraha, Mudane Xamsa Cabdi Barre. Intii uu socday kulanka, Madaxweynaha ayaa bixiyay warbixin faahfaahsan oo ku saabsan xaaladda guud ee dalka, isagoo Golaha Wasiirrada ku bogaadiyay doorkooda muuqda ee wax ku oolka ah ee ay ka qaateen hirgelinta doorashadii qof iyo cod ee 25-kii Diseembar 2025 ka dhacday Muqdisho. Wuxuu doorashadaas ku tilmaamay dhacdo taariikhi ah oo dad badan ay shaki ka qabeen in la gaari karo.

Madaxweyne Xasan Sheekh Maxamuud ayaa sidoo kale ka hadlay waxa uu ku tilmaamay weerar cad oo lagu qaaday madaxbannaanida Soomaaliya, isagoo xusay in dowladdu ay guulo la taaban karo ka gaartay tallaabooyin diblomaasiyadeed oo ay ka qaadday arrintaas. Wuxuu ugu baaqay xubnaha Golaha Wasiirrada inay mideysnaadaan si ay u difaacaan qaranka, isagoo carrabka ku adkeeyay muhiimadda ay leedahay wadajir, wadatashi, iyo mas’uuliyad wadareed loogu adeegayo shacabka Soomaaliyeed loogana jawaabayo caqabadaha taagan.

Intii uu socday kulanka, Golaha Wasiirrada ayaa ansixiyay laba is-afgarad (MoU) oo muhiim ah oo lagu xoojinayo iskaashiga caalamiga ah ee Soomaaliya:

• Is-afgarad u dhexeeya Dowladaha Soomaaliya iyo Uganda oo ku saabsan iskaashiga amniga.

• Is-afgarad u dhexeeya Dowladda Soomaaliya iyo Boqortooyada Sacuudiga oo ku saabsan iskaashiga gaadiidka badda.

Golaha Wasiirrada ayaa sidoo kale meel mariyay dhowr hindise-sharci iyo siyaasado qaran, kuwaas oo ay ka mid yihiin:

• Sharciga Caddeymaha.

• Ansixinta Heshiiska Caalamiga ah ee Heerarka Tababarka, ruqsad siinta iyo Kormeerka Shaqaalaha Badaha (STCW), 1978.

• Sharciga lagu dhisayo Machadka Badaha Soomaaliyeed.

• Xeerar la xiriira Sharciga Ilaalinta Xogta Dadweynaha.

• Siyaasadda Qaran ee Naafada.

Gunaanadkii kulanka, Golaha Wasiirrada ayaa dhageystay warbixin uu soo jeediyay Wasiirka Batroolka iyo Macdanta, Mudane Daahir Shire Maxamed, oo ku saabsan diyaar-garowga bilaabista soo saarista shidaalka Soomaaliya. Golaha ayaa sidoo kale helay warbixin ka timid Hay’adda Maareynta Musiibooyinka Qaranka (SODMA) oo ku saabsan xaaladda abaaraha ka jira qaybo ka mid ah dalka.