Ciidanka Xoogga Dalka Soomaaliyeed, iyagoo kaashanaya saaxiibada caalamiga ah, ayaa xalay fuliyay hawlgal cir ah oo si hore loo qorsheeyay, kaas oo ka dhacay deegaanka Jabad Godone ee gobolka Shabeellaha Dhexe.
Hawlgalka ayaa lagu bartilmaameedsaday goob ay kooxda argagixisada Al-Shabaab u adeegsan jirtay qorsheynta iyo isku-dubbaridka falal argagixiso, gaar ahaan samaynta iyo adeegsiga walxaha qarxa ee lagu dhibaateeyo shacabka rayidka ah. Natiijada hawlgalkaas ayaa lagu dilay 17 ka mid ah xubnaha argagixisada.
Sidoo kale, hub iyo gaadiid ay kooxdu u adeegsan jirtay fulinta falalkooda dambiyeed ayaa si buuxda loo burburiyay.
Ciidanka Xoogga Dalka Soomaaliyeed ayaa mar kale adkeeyay ka go’naanshahooda ah inay sii wadaan hawlgallada qorshaysan ee lagu burburinayo Al-Shabaab, si loo xaqiijiyo amniga, xasilloonida, iyo badbaadada shacabka Soomaaliyeed.
