Dawladda Suudaan ayaa Talaadadii ku eedaysay maleeshiyada RSF inay geysteen “xasuuq,” iyadoo dalbatay in beesha caalamku qaaddo tallaabo ka baxsan muujinta walaac oo kaliya.

“Dawladda Suudaan waxay khudbaddan u jeedinaysaa golahan iyadoo ku jirta waqti masiibo qaran oo aad u weyn, iyo walaac caalami ah oo qoto dheer,” ayuu yiri Wasiir Faisal Abdelazim Salim Mohamed, oo ka hadlayay kulan heer sare ah oo Qaramada Midoobay u qabatay xuska 10-aad ee Maalinta Caalamiga ah ee Xusuusta iyo Karaamada Dhibanayaasha Dambiyada Xasuuqa.

Wuxuu sheegay in dadka rayidka ah ee ku nool El-Fasher iyo meelo kaleba si ula kac ah loogu geystay dilal wadareed, kufsi, barakicin qasabka ah iyo xasuuq qawmiyadeed.

“Ficilladan, marka laga eego baaxaddooda iyo ujeedkooda, waxay buuxinayaan qeexitaanka sharci ee xasuuqa,” ayuu raaciyay. “Dambiyadaas ay geysteen maleeshiyada RSF ma aha kuwo qarsoon. Waa kuwo la diiwaangeliyay. Waa kuwo la ogyahay. Waxayna mudan yihiin in laga qaado tallaabo dhaafsiisan hadallo walaac muujin ah. Waxay dalbanayaan isla xisaabtan.”

Suudaan waxay ku boorisay beesha caalamka inay cambaareynta u beddelaan “tallaabooyin dhab ah, sharci ah oo go’aan leh oo lagu difaaco shacabka.”

Mohamed wuxuu ku baaqay in si degdeg ah loo joojiyo qulqulka hubka iyo taageerada militariga ee RSF ee ka imanaya dalalka gobolka iyo kuwa caalamiga ah, in la saaro cunaqabatayn gaar ah dadka abaabulaya ama maalgelinaya xadgudubyada, in la diido meelaha nabdoon ee lagu martigeliyo shaqsiyaadka wada rabshadda, iyo in la xoojiyo iskaashiga caalamiga ah si loo hubiyo in hubka la dhoofiyo aanu gaarin kooxaha hubaysan ee aan dawliga ahayn.

“Xasuuq ma aha oo keliya dambi ka dhan ah dhibbanayaasha. Waa tijaabo ku saabsan nidaamka caalamiga ah laftiisa,” ayuu yiri.

Dagaalka u dhexeeya ciidamada Suudaan iyo RSF, oo billowday Abriil 2023, ayaa lagu dilay kumannaan qof, halka malaayiin kalena ay ku barakaceen.