Wasiirka Arrimaha Dibadda iyo Iskaashiga Caalamiga ah ee XFS, Mudane Cabdisalaam Cabdi Cali, ayaa booqasho rasmi ah ku tagay Boqortooyada Sacuudiga, halkaas oo Axaddii magaalada Riyaad uu kula kulmay dhiggiisa, Wasiirka Arrimaha Dibadda ee Boqortooyada walaalaha ah ee Sacuudiga, Amiir Faisal bin Farhan bin Abdullah Al Saud, iyagoo ka wada hadlay arrimo la xiriira madaxbannaanida iyo dhul-weynimada Jamhuuriyadda Federaalka Soomaaliya.
Intii uu socday kulanka, Wasiir Cabdisalaam ayaa muujiyay qadarin weyn oo uu u hayo mowqifka taageerada leh ee Sacuudiga u muujiyay Soomaaliya, isagoo bogaadiyay garab-istaagga joogtada ah iyo midnimada aan kala go’a lahayn ee Boqortooyadu la garab taagan tahay shacabka Soomaaliyeed iyo midnimada dalka.
Dhankiisa, Wasiirka Arrimaha Dibadda Sacuudiga ayaa mar kale xaqiijiyay taageerada buuxda ee Boqortooyadu u hayso madaxbannaanida, midnimada, iyo dhul-weynimada Jamhuuriyadda Federaalka Soomaaliya, isagoo carrabka ku adkeeyay ka go’naanshaha Riyaad ee ku aaddan amniga iyo xasilloonida Soomaaliya, isla markaana muujiyay diidmada wax kasta oo halis gelin kara.
Kulanka ayaa sidoo kale lagu gorfeeyay siyaabaha lagu xoojin karo xiriirka labada dal ee dhinacyo kala duwan, waxaana intaas dheer in laga wada hadlay horumarrada gobolka iyo arrimo dan guud ah.
