Soomaaliya ayaa si rasmi ah ula wareegtay Madaxtinimada Golaha Ammaanka ee Qaramada Midoobay, taasoo astaan u ah marxalad muhiim ah oo ka tarjumaysa kororka doorka ay ku leedahay masraxa caalamiga ah.
Dalka Geeska Afrika ayaa la filayaa inuu hoggaamiyo howlaha Golaha Ammaanka inta lagu jiro bisha Janaayo, isaga oo shir guddoomin doona kulamada iyo ajandaha shaqo ee golaha, oo mas’uul ka ah ilaalinta nabadda iyo amniga caalamiga ah.
Madaxtinimada Soomaaliya ee Golaha Ammaanka Qaramada Midoobay waxaa hoggaamin doona Wakiilka Joogtada ah ee Soomaaliya u fadhiya Qaramada Midoobay, Abukar Cusmaan, kaas oo xilka kala wareegaya Samuel Žbogar oo ka socday Slovenia.
Bayaan ay soo saartay Ergada Soomaaliya ee Qaramada Midoobay ayaa lagu sheegay in inta lagu jiro madaxtinimada, Soomaaliya ay fududeyn doonto “wadahadal wax ku ool ah oo loo dhan yahay.”
Nabadda Caalamiga ah
Waxa kale oo bayaanka lagu sheegay in Soomaaliya ay ku hagayso “waajib qoto dheer oo ku aaddan ilaalinta nabadda iyo amniga caalamiga ah,” isla markaana ay mudnaan siin doonto “habraacyo shaqo oo hufan, wax ku ool ah, kuna dhisan is-afgarad.”
Doorka madaxtinimada wareega ah, oo dhaqan galay 1-da Janaayo 2026, ayaa yimid kaddib markii Soomaaliya sanadkii hore loo doortay xubin aan joogto ahayn oo ka tirsan Golaha Ammaanka Qaramada Midoobay oo ka kooban 15 xubnood.
Liberia iyo Jamhuuriyadda Dimuqraadiga ah ee Congo ayaa ahaa dalalka kale ee Afrikaan ah ee loo doortay muddo labo sano ah, taasoo billaabatay 1-da Janaayo 2026.
Inkasta oo arrintani tahay mid muhiim ah, haddana joogitaanka dalalka Afrika ee xubnaha aan joogtada ahayn ayaa weli ka hooseeya dalabka qaaradda.
Awoodda Diidmada Qayaxan (Veto)
Muddo tobannaan sano ah, dalalka Afrika ayaa dalbanayay kuraas joogto ah oo leh awoodda diidmada, iyagoo ku dhaleeceeyay nidaamka hadda jira inuu yahay mid “aan caddaalad ahayn” marka loo eego qaaradda.
Shanta dal ee keliya ee leh kuraas joogto ah iyo awoodda diidmada ee Golaha Ammaanka waa: Mareykanka, Britain, Faransiiska, Ruushka, iyo Shiinaha.
Tani waa markii ugu horreysay ee Soomaaliya ay qabato Madaxtinimada Golaha Ammaanka Qaramada Midoobay muddo 55 sano ah, iyadoo markii ugu dambeysay ay shir guddoomisay golaha sanadkii 1971.
Horumarkan cusub ayaa falanqeeyayaashu u arkaan astaan kale oo muujinaysa dib-u-soo-noqoshada Muqdisho kaddib sanado ay dalka ka jireen colaado hubeysan oo gudaha ah iyo masiibooyin dabiici ah.
Si kastaba ha ahaatee, wuxuu imanayaa xilli xasaasi ah oo ay jirto xiisad u dhexeysa Soomaaliya iyo Mareykanka, iyadoo maamulka Trump uu bartilmaameedsanayo dad asal ahaan Soomaali ah oo ku nool Mareykanka.
Sidoo kale, caro caalami ah ayaa ka dhalatay aqoonsiga ay Israa’iil dhawaan siisay Somaliland oo ah gobol ka go’ay Soomaaliya, iyadoo Muqdisho ay sheegtay in tallaabadaasi ay ku xadgudbayso madaxbannaanida iyo dhul-weynimada dalka.
