Turkiga iyo Soomaaliya ayaa ku heshiiyey inay xoojiyaan iskaashiga dhinacyada tamarta, amniga, iyo tiknoolojiyada.

Arrintan ayaa timid kaddib kulan heer sare ah oo Talaadadii ka dhacay Istanbul, kaas oo dhex maray Madaxweynaha Turkiga, Recep Tayyip Erdogan, iyo dhiggiisa Soomaaliya, Xasan Sheekh Maxamuud.

Madaxweyne Erdogan ayaa sheegay in labada dal ee walaalaha ah ay sii wadi doonaan horumarinta xiriirkooda “ku saleysan taariikh qoto dheer, xiriir bani’aadannimo, iyo dhaqan wadaag.”

Madaxweynaha Turkiga ayaa sidoo kale mar kale xaqiijiyey taageerada Ankara ay u hayso amniga iyo xasilloonida Soomaaliya.

Iskaashiga dhanka tamarta

Iskaashiga dhinaca tamarta ayaa ahaa qodob muhiim ah oo ay labada hoggaamiye ka wada hadleen, iyadoo Madaxweyne Erdogan uu xusay in markabka cilmi-baarista seismic-ka ee Turkiga, Oruç Reis, uu dhammeystiray sahamin socotay sagaal bilood oo laga fuliyey biyaha badda Soomaaliya, taasoo baaxaddiisu gaaraysay 4,465 kiiloomitir oo laba jibbaaran.

Iyadoo lagu saleynayo natiijooyinka sahminta, Turkiga ayaa qorsheynaya inuu bilaabo qodista ceelasha sannadka 2026. Sida uu sheegay Madaxweyne Erdogan, tallaabadan ayaa si weyn uga qayb qaadan doonta koboca dhaqaale ee shacabka Soomaaliyeed.

Hoggaamiyeyaasha Turkiga iyo Soomaaliya ayaa sidoo kale ku dhawaaqay iskaashi “taariikhi ah” oo ku saabsan waaxda hawada sare.

Heshiisyada cusub ee la saxiixay awgood, Turkiga iyo Soomaaliya ayaa doonaya inay dhisaan xarun dayax-gacmeed oo laga hirgeliyo dalka Geeska Afrika. Sida uu sheegay Madaxweyne Erdogan, waxaa la dhameystiray qorshaynta wejiga koowaad ee mashruucan, kaasoo ka kooban saddexda marxaladood, waxaana sidoo kale biloowday dhismaha mashruuca iyadoo ay isku dubbaridayso Hay’adda Hawada Sare ee Turkiga.

Mashruucan ayaa ujeedkiisu yahay horumarinta kaabeyaasha tiknoolojiyada hawada sare, ridista gantaallada, iyo dayax-gacmeedyada.

Madaxweyne Erdogan ayaa sidoo kale carrabka ku adkeeyey in Turkiga uu sii wadi doono gargaarka bani’aadannimo iyo kan horumarineed ee uu siiyo Soomaaliya, iyada oo loo marayo hay’ado gargaar sida Laanqayrta Cas ee Turkiga, TİKA, iyo AFAD.

Erdogan: Aqoonsiga Israa’iil ee Somaliland waa mid sharci-darro ah oo aan la aqbali karin

Intii ay socdeen wadahadalladan, Turkiga ayaa mar kale xaqiijiyey mowqifkiisa ku aaddan madaxbannaanida iyo midnimada dhuleed ee Soomaaliya, iyadoo Madaxweyne Erdogan uu sheegay in ilaalinta midnimada qaran ee Muqdisho ay weli tahay mudnaan sare oo ay wadaagaan labada dal.

Madaxweyne Erdogan ayaa si gaar ah u diiday go’aankii Israa’iil ee 26-ka Diseembar ay ku aqoonsatay Somaliland inay tahay dal madax-bannaan, isagoo ku tilmaamay tallaabadaas “mid sharci-darro ah oo aan la aqbali karin.”

Midnimo iyo wadajir qaran

“Xukuumadda (Ra’iisul Wasaaraha Israa’iil, Benjamin) Netanyahu, oo gacmaheeda ay ku yaallaan dhiigga 71,000 oo walaalaheen Falastiiniyiin ah, ayaa hadda doonaysa inay Geeska Afrika geliso xasillooni-darro kaddib weerarradii ay ka geysatay Qaza, Lubnaan, Yemen, Iiraan, Qadar, iyo Suuriya,” ayuu ka digay Madaxweyne Erdogan, isagoo ballanqaaday inuu “garab istaagi doono shacabka Soomaaliyeed” si loo diido nooc kasta oo daandaansi ah oo ka yimaada Israa’iil.

Gabagabadii, Erdogan ayaa muujiyey kalsooni ah in shacabka Soomaaliyeed ay sii wadi doonaan inay ku dhaqmaan midnimo, is-garabsasho, iyo wadajir qaran.

Madaxweyne Xasan Sheekh, oo uga mahadceliyey Ankara taageerada joogtada ah ee ay u hayso qaddiyadda Soomaaliyeed, ayaa ku jooga Turkiga booqasho rasmi ah oo uu ku yimid martiqaad uu ka helay Madaxweyne Erdogan.