Christina Koch, wata 'yar sama jannati da ta yi karatu a Ghana, za ta kafa tarihi a matsayin mace ta farko da ta yi tafiya daga duniyarmu ta Earth zuwa duniyar Wata tare da tawagarta a aikin tafiyar jirgin sama jannati na Artemis II.

Ghana da sauran kasashen duniya sun jinjina mata da tawagarta baki daya.

Alakar Koch da kasar da ke Yammacin Afirka wani muhimmin ɓangare ne na labarinta. Ta shafe wasu lokuta a matsayin ɗalibar musayar ilimi a Jami'ar Ghana a zangon shekarar karatu tsakanin 1999/2000, inda ta karanta kimiyyar taurari tare da samun kanta da son al'adun Ghana.

Duk da kasancewarta a sararin samaniya, ba ta manta da ƙasar ba. Ta ɗaga tutar Ghana yayin da suke tafiya a cikin jirgin sama jannati a matsayin wata sadaukarwa da kuma girmamawa ga ƙasar ta yankin Yammacin Afirka.

'Yanayi mai ratsa zuciya'

Shugaban ƙasar Ghana John Mahama ya bayyana farin cikinsa kuma ya yi mata fatan nasara tare da tawagarta a tafiyar aikinsu na zuwa duniyar wata da kuma dawowa lafiya.

A cikin wata sanarwa da aka fitar ranar 9 ga Afrilu, Shugaba Mahama ya ce karamcin da Koch ta yi na ɗaga tutar ƙasar Ghana a sararin samaniya "yanayi ne mai ratsa zuciya ga kowane ɗan ƙasar Ghana".

Shugaba Mahama ya ƙara da cewa rayuwarta daga Jami’ar Ghana zuwa na gaba-gaba a cikin masu bincike a sararin samaniya ya zama "wani abin karfafa gwiwa sosai" ga kowane matashi ɗan ƙasar Ghana da Afirka.

Kazalika ya ce hakan tunatarwa ne na cewa cibiyoyin ilimi na ƙasar "suna ci gaba da samar da kuma tsara shugabannin duniya waɗanda ke kafa tahiri tare da kaiwa babban matsayi a rayuwa".

An haife ta a shekarar 1979 a jihar Michigan ta Amurka, rayuwar Koch zuwa sararin samaniya ta soma ne ta hanyar samun tushe mai ƙarfi a fannin karanta injiniyan lantarki da kimiyyar lissafi, inda ta sami digirinta na farko da na biyu daga Jami'ar Jihar North Carolina.

Tafiyar farko ta mata zalla zuwa sararin samaniya

Manyan ayyukan da 'yar sama jannatin ta yi sun haɗa da zaman kwanaki 328 a Tashar Sararin Samaniya ta Duniya, inda ta gudanar da bincike mai zurfi kuma ta shiga aikin tafiyar mata zalla zuwa sararin samaniya tsakanin 2019 da 2020.

A matsayinta na ƙwararriya a tawagar jirgin Artemis II, Koch na daga cikin mutanen da za su kafa tarihin zuwa duniyar Wata tare da gudanar da muhimman ayyukan bincike.

A yayin tafiyar kwanaki 10 da ta fara a ranar 1 ga Afrilu, 2026, Koch da abokan aikinta - Reid Wiseman, Victor Glover, da Jeremy Hansen - sun yi tafiyar mil 6,400 zuwa ga duniyar wata.

Wannan dai ita ce tafiyar ɗan adam ta farko zuwa duniyar wata tun bayan fiye da shekaru 50 jirgin Apollo ya kafa tarihi a shekarun 1970.