Qaramada Midoobay ayaa Arbacadii ka digtay in carruurta Suudaan ay weli ku jiraan halis weyn iyadoo rabshaduhu ay sii socdaan “iyadoo aan la xakameyn,” kadib markii ugu yaraan 15 carruur ah la sheegay in lagu dilay 10 kalena lagu dhaawacay weerar diyaarad aan duuliye lahayn oo Isniintii lagu qaaday xero barakacayaal oo ku taalla Al Sunut ee Galbeedka Kordofan.

“Qoysas quus ah oo ku sugan Suudaan ayaa magan u raadsanaya xeryaha barakacayaasha kadib markii ay ka carareen gaajo iyo rabshado. Ilaalintoodu waa waajib,” ayay tiri Agaasimaha Fulinta ee UNICEF Catherine Russell bayaan ay soo saartay.

“Guud ahaan gobolka Kordofan, waxaan arkeynaa isla qaababka walaaca leh ee ka jira Daarfuur – carruur la dilay, la dhaawacay, la barakiciyay isla markaana laga gooyay adeegyada ay u baahan yihiin si ay u noolaadaan,” ayay ku dartay.

UNICEF ayaa ugu baaqday dowladda Suudaan iyo dhammaan dhinacyada colaadda inay ilaaliyaan rayidka, gaar ahaan carruurta, joojiyaan weerarrada lagu hayo kaabeyaasha rayidka oo ay ku jiraan goobaha barakacayaasha, isla markaana hubiyaan in gargaar bani’aadamnimo oo ammaan ah, joogto ah oo aan carqalad lahayn la gaarsiiyo iyadoo baahiyaha ay si degdeg ah u sii kordhayaan.