Akizungumza katika Kaunti ya Uasin Gishu siku ya Jumamosi, Januari 3, Ruto alitetea msimamo wake mkali, akisema yuko tayari kukabiliana na madhara yoyote yatakayojitokeza kutokana na msukumo wa kuanzisha sheria kali zaidi.

Akisema hatua hii inalenga kuimarisha mapambano dhidi ya dawa za kulevya na pombe haramu nchini Kenya.

“Kwa watu wote wanaohusika katika biashara ya pombe haramu, tutabadilisha sheria. Zamani kulikuwa na sheria iliyosema kwamba ukikamatwa ukifanya biashara ya dawa za kulevya, ikiwemo dawa hatari kama heroin, adhabu ilikuwa ni faini ya shilingi milioni moja. Sasa tunabadilisha hilo ili adhabu iwe kunyongwa,” alisema Rais Ruto.

“Mnajua nikisema jambo, nimelisema, na niko tayari kukabiliana na matokeo yake. Tunahitaji kuwa na nidhamu na utaratibu. Familia nyingi sana zinateseka kwa sababu ya kokeini,” aliendelea kusema.

Rais aliongeza kuwa sheria inayopendekezwa, itakayowasilishwa bungeni, pia itaruhusu serikali kutaifisha mali zinazohusishwa na uuzaji wa pombe haramu na dawa za kulevya. Hii ni pamoja na magari na mali nyingine zilizopatikana kupitia mapato ya biashara hiyo haramu.

Ruto aliwataka Wabunge kuunga mkono muswada huo mpya, akisema kuwa takribani Wakenya milioni tano walioathiriwa na matumizi ya dawa za kulevya ni janga kubwa lisiloweza kuendelezwa. 

Rais aliongeza kuwa kitengo hicho kitawekewa vifaa vya kisasa vya ufuatiliaji, ukusanyaji wa taarifa za kijasusi, uchunguzi wa kisayansi (forensic), na uchunguzi wa kifedha, ili kiweze kufanya kazi kama timu ya kudumu ya taasisi mbalimbali, kwa kushirikiana kwa karibu na NACADA.