Tunarejea na sehemu nyingine ya mfululizo wetu unaoangazia vipaji vya riadha barani Afrika.

Na leo tunafuatilia safari inayotoka katika familia tulivu ya Sudan Kusini hadi kwenye ulingo wa dunia wa mbio fupi.

Huyu ni Gout Gout — mmoja wa wakimbiaji chipukizi wa mbio fupi wanaovutia zaidi katika ulimwengu wa riadha.

Wazazi wake walihama kutoka Sudan Kusini hadi Australia, na Gout alizaliwa Brisbane tarehe 29 Disemba 2007.

Hakuanza kujihusisha na riadha kwa ushindani hadi alipokuwa na umri wa takriban miaka 12.

Akiwa shuleni, kasi yake ilivutia mara moja macho ya makocha, na kufikia mwaka wa 2022, akiwa na umri wa miaka 14 tu, tayari alikuwa akivunja rekodi za Australia katika kundi la umri wake.

Mafanikio yake makubwa yaliingia katika hatua mpya mwaka 2024.

Katika Mashindano ya Dunia ya Vijana wenye umri chini ya miaka 20 yaliyofanyika Lima, Peru, Gout alishinda medali ya fedha katika mbio za mita 200 kwa muda wa sekunde 20.6, hii ikiwa ni medali yake ya kwanza kubwa ya kimataifa.

Kisha, Disemba mwaka huo, aliwashangaza wadau wa riadha nchini Australia alipokimbia mbio za mita 200 kwa sekunde 20.04, akivunja rekodi ya Australia na Oceania ambayo ilikuwa imedumu tangu enzi za Peter Norman alipokimbia kwa sekunde 20.06 katika Michezo ya Olimpiki ya Mexico mwaka wa 1968.

Akawa kijana wa miaka 16 mwenye kasi zaidi kuwahi kutokea katika mbio za mita 200 wakati huo, akivunja rekodi ya dunia ya umri huo iliyokuwa ikishikiliwa na Usain Bolt.

Mwaka 2025, Gout alishinda taji lake la kwanza la ngazi ya juu la Australia katika mbio za mita 200 na kushiriki kwa mara ya kwanza katika Mashindano ya Dunia ya ngazi ya juu jijini Tokyo.

Kisha kukafuata sura nyingine ya kipekee.

Aprili 2026, katika Mashindano ya Australia jijini Sydney, Gout alikimbia kwa sekunde 19.67 na kushinda mbio za mita 200.

Hilo lilimfanya kuwa Muaustralia wa kwanza kukimbia umbali huo kwa muda wa chini ya sekunde 20 kulingana na kanuni rasmi.

Pia ilivunja rekodi yake binafsi ya Australia na kuweka rekodi mpya ya dunia kwa vijana walio chini ya umri wa miaka 20.

Akiwa na umri wa miaka 18 pekee, alikuwa mmoja wa wakimbiaji wenye kasi zaidi kuwahi kutokea katika mbio za mita 200 kwa kundi la vijana walio chini ya umri wa miaka 20 na akashinda taji lingine la Australia la mbio za mita 100 kwa vijana walio chini ya umri wa miaka 20 mwaka wa 2026.

Hata hivyo, mwaka huu kwa bahati mbaya, Gout alipata jeraha la misuli wa paja alipokuwa mazoezini na ilibidi ajiondoe kwenye Mashindano ya Dunia ya Chini ya Miaka 20 ya 20 huko Oregon, ambapo alikuwa amechaguliwa kukimbia mbio za mita 200 na mbio za kupokezana vijiti za mita 4 kwa 400.

Kwa hivyo, mashabiki wa Gout Gout mwenye umri wa miaka 18, anayeshikilia rekodi ya Dunia ya Chini ya Miaka 20, kwa mara ya kwanza watakosa kumshuhudia mwanariadha huyo anayeleta msisimko wa aina yake akiwa katika mashindano.

Tufuatilie TRT Afrika Swahili tunapofichua vipaji zaidi vya chipukizi wa riadha kutoka Afrika vinavyostahili kutazamwa.