Akizungumza Jumapili, Novemba 9, katika mahojiano ya redio mjini Mbale alipokuwa akifanya kampeni za uchaguzi, Museveni alieleza kuwa kuzuia nchi zisizo na bandari kufikia bahari ni “wazimu,” akisisitiza kuwa Uganda ina haki ya kutumia Bahari ya Hindi kutokana na mahitaji yake ya kiuchumi na kiusalama.

Alilalamika kuwa ni jambo lisilo la haki kuzuia nchi ambazo hazina bandari kupata njia muhimu ya biashara na masuala ya ulinzi wa kimkakati.

Museveni pia alifafanua ugumu unaoikabili Uganda katika kuunda jeshi la wanamaji kwa ajili ya kujilinda kwa sababu haina uwezo wa kufikia bahari.

Alisema kwamba mara kadhaa nchi yake imekuwa na changamoto katika mazungumzo na Kenya kuhusu miradi muhimu ya miundombinu inayohitaji ufikiaji wa moja kwa moja katika Bahari ya Hindi.

Alisema: “Hapa Uganda, hata kama tunataka kuunda jeshi la wanamaji, tunawezaje kuwa nalo bila bahari? Hatuna uwezo wa kufikia bahari. Utaratibu wa siasa za Afrika hauna mantiki. Baadhi ya nchi hazina bandari, si kwa sababu za kiuchumi tu, bali pia kwa ajili ya ulinzi. Unakwama. Tutasafirisha bidhaa zetu vipi? Ndiyo maana tumekuwa na mazungumzo na Kenya. Mazungumzo kuhusu reli, bomba la mafuta – hayaishi. Lakini ile bahari ni yangu, kwa sababu ni bahari yangu. Nina haki ya kuitumia. Na kama hali ikiendelea hivi, siku za usoni tutakuwa na vita.”