Jirgin yakin Turkiyya na farko maras matuƙi, Bayraktar KIZILELMA, ya kafa tarihi a duniyar jiragen sama ta hanyar zama jirgi maras matuƙi na farko a tarihi da ya harba makami mai linzami kai tsaye kan wani jirgin a sararin samaniya a lokacin wani atisaye a gaɓar tekun Sinop.

A cewar wata sanarwa daga kamfanin tsaro na ƙasar Turkiyya Baykar a ranar Lahadi, KIZILELMA ya harba makami mai linzamin wanda aka ƙera a cikin gida mai suna GOKDOGAN zuwa ga jirgin yaƙin da aka umarci ya harba mawa inda kuma ya harba shi daidai yadda ake so.

Jirgin mara matuƙin ya harba makami mai linzamin daga ƙarƙashin ɗaya daga cikin fikafikansa zuwa ga jirgin da yake son harba mawa ta hanyar amfani da na’urar bin diddiƙin jirgi a sararin samaniya ta MURAD AESA.

Wannan nasarar ta tabbatar da jirgin KIZILELMA a matsayin jirgi na farko kuma maras matuƙi a duniya da ke da irin fasahar ta yaƙi da abokan gaba a sararin samaniya.

Gwajin da aka yi ya haɗa da jiragen yaƙin F-16 guda biyar daga sansanin jiragen sama na Merzifon waɗanda suka tashi zuwa sararin samaniya a cikin tsari tare da KIZILELMA.

Jirgin sama maras matuƙi na Bayraktar AKINCI ya taimaka wurin wannan gwajin inda ya rinƙa ɗaukar bidiyon abin da ke faruwa.

Na’urar bin diddiƙin jirage ta KIZILELMA da kuma sanso-sanso da yake da shio ya ba shi damar gano jirgin yaƙin abokan gaba daga wuri mai nisa ba tare da an ganshi ba.

Jirgin ya ƙunshi sabbin fasahohi kamar na’urar bin diddiƙi ta MURAD AESA da tsarin harba makamai na TOYGUN, kuma zai iya ɗaukar nau’ukan makamai da dama da aka ƙera a cikin gida.

A wasu gwaje‑gwaje na baya, KIZILELMA ya samu nasarar harba makaman OLUN da TEBER-82 kai tsaye ba tare da matsala ba.

Wannan sabon farmakin da jirgin ya kai ya nuna ƙarfin da yake da shi wurin kai hari da makamai masu linzami ta sama da kuma ta ƙasa, wanda hakan ke ƙara faɗaɗa aikin da Turkiyya ke yi wurin samar da makami.

Kamfanin Baykar, wanda ya rika saka hannun jari da kansa cikin dukkan ayyukan jirage marasa matuƙa tun 2003, ya zama ɗaya daga cikin jagorori a duniya wajen fitar da jirage marasa matuƙa

Kamfanin ya samu kuɗaɗe ta hanyar ffitar da kaya da suka kai dala $1.8 biliyan a 2023 kuma ya maimaita wannan adadin a 2024, inda kashi 90% na jimlar kuɗinsa ya fito ne daga fitarwa.

Baykar ya sanya hannu kan yarjejeniyoyin fitarwa na jiragensa maras matuƙa na Bayraktar TB2 tare da ƙasashe 36 da kuma don Bayraktar AKINCI tare da ƙasashe 16.

A cewar bayanan hukuma, kamfanin ya kasance babban mai fitar kayan tsaro da sararin sama a Turkiyya a cikin shekaru huɗu da suka gabata.