Wasiirka Arrimaha Dibadda iyo Iskaashiga Caalamiga ah ee Jamhuuriyadda Federaalka Soomaaliya, Mudane Cabdisalaam Cabdi Cali, ayaa Talaadadii magaalada Pretoria kulan laba geesood ah kula yeeshay dhiggiisa Jamhuuriyadda Koonfur Afrika, Mudane Ronald Lamola.
Wadahadallada ayaa diiradda lagu saaray xoojinta xiriirka taariikhiga ah ee ka dhexeeya Soomaaliya iyo Koonfur Afrika, iyadoo ujeedadu tahay horumarinta iskaashi wax ku ool ah oo dhinacyo badan leh.
Labada wasiir ayaa ka wada hadlay ballaarinta iskaashiga waaxyo kala duwan, oo ay ka mid yihiin ganacsiga, waxbarashada, caafimaadka, horumarinta awoodda aadanaha, iyo beeraha. Waxay adkeeyeen muhiimadda ay leedahay hirgelinta tallaabooyin wax ku ool ah oo keena natiijooyin la taaban karo oo ay ka faa’iideystaan muwaadiniinta labada dal.
Wasiir Cabdisalaam ayaa uga mahadceliyay Dowladda Koonfur Afrika taageerada joogtada ah ee ay u fidiso mabaadi’da madaxbannaanida, midnimada, iyo amniga Soomaaliya.
Labada dhinac ayaa mar kale adkeeyay sida ay uga go’an tahay sii wadista iskaashiga iyo is-waafajinta mowqifyada ay wadaagaan ee fagaarayaasha gobolka iyo kuwa caalamiga ah, gaar ahaan arrimaha la xiriira nabadda, xasilloonida, iyo horumar waara.
