Guddoomiyaha Golaha Shacabka ee Baarlamaanka Federaalka Soomaaliya, Mudane Sheekh Aadan Maxamed Nuur (Madoobe), ayaa kulan la yeeshay odayaasha dhaqanka iyo hoggaamiyeyaasha bulshada ee Koonfur Galbeed si looga hadlo xaaladda ka jirta gobolka.
Intii uu kulanku socday, odayaasha ayaa Guddoomiyaha warbixin ka siiyay xaaladaha ay wajahayaan bulshooyinka ku nool Koonfur Galbeed, iyagoo carrabka ku adkeeyay baahida degdegga ah ee loo qabo xalal waara oo lagu xalliyo caqabadaha ka jira deegaanka.
Guddoomiye Madoobe ayaa ku ammaanay odayaasha doorkooda muhiimka ah ee ku aaddan taageeridda nabadda, xasilloonida iyo horumarka, wuxuuna ku boorriyay inay sii xoojiyaan dadaalladooda ku aaddan horumarinta maamulka iyo kobcinta horumarka Koonfur Galbeed.
Kulanka ayaa waxaa sidoo kale ka qayb galay Wasiirka Dekedaha iyo Gaadiidka Badda, Cabdulqaadir Maxamed Nuur, iyo xubno ka tirsan Golaha Shacabka ee Baarlamaanka Federaalka Soomaaliya.
