Wasiirka arrimaha dibadda Iiraan ayaa sheegay in marinka Hormuz uu furan yahay, balse maraakiibtu ay ka cabsanayaan inay maraan sababo la xiriira dagaalka Maraykanka iyo Israa’iil ee ka dhanka ah Tehran.
“Marinka Hormuz lama xirin. Maraakiibtu way ka labalabeeyaan sababtoo ah shirkadaha caymiska ayaa ka cabsi qaba dagaalka aad bilowdeen — ma aha Iiraan,” ayuu Abbas Araghchi Axaddii ku qoray barta X.
“Ma jiro caymis bixiye — mana jiro shakhsi Iiraani ah — oo lagu qancin karo hanjabaado dheeraad ah. Tixgelin muujiya,” ayuu raaciyay.
“Xorriyadda maraakiibta ma jiri karto haddii aysan jirin xorriyadda ganacsiga. Labadaba ixtiraama — ama midna ha filanina.”
Bayaan ay Wasaaradda Arrimaha Dibadda Iiraan ku daabacday X ayaa sidoo kale lagu sheegay in marinka Hormuz “uusan xiranayn.”
Si kastaba ha ahaatee, waxay intaas ku dartay in maraakiibta “ka tirsan dhinacyada weerarka ah aan loo tixgelin karin marin caadi ah oo aan colaad lahayn, waxaana loola dhaqmi doonaa si waafaqsan qaabka sharci ee ka dhashay colaadda iyo go’aannada ay gaaraan hay’adaha Iiraan ee awoodda u leh.”
Xiritaanka marinka
Tan iyo horraantii Maarso, Iiraan ayaa si wax ku ool ah u xirtay marinka Hormuz, oo ah marin muhiim u ah dhoofinta shidaalka, kaas oo caadiyan qaada ku dhowaad 20 milyan oo foosto maalintii iyo qiyaastii 20 boqolkiiba ganacsiga gaaska dareeraha ah ee caalamka, iyadoo ay maraakiib badani ka baaqsadeen.
Xiritaankaasi ayaa sare u qaaday kharashaadka maraakiibta iyo caymiska, kordhiyay qiimaha shidaalka, isla markaana abuuray walaac dhaqaale oo caalami ah.
Sabtidii, Madaxweynaha Maraykanka Donald Trump ayaa ku hanjabay inuu “burburin doono” warshadaha korontada ee Iiraan, isagoo ka bilaabi doona kuwa ugu waaweyn, haddii Tehran aysan 48 saacadood gudahood dib u furin marinka muhiimka ah.
Xiisadaha gobolka ayaa sii kordhay tan iyo markii Maraykanka iyo Israa’iil ay weerar ku qaadeen Iiraan 28-kii Febraayo, iyadoo Tehran ay kaga jawaabtay weerarro isdaba joog ah oo drones iyo gantaallo ah oo lagu beegsaday Israa’iil iyo dalalka Khaliijka ee martigeliya saldhigyada milatari ee Maraykanka.
