Anga ya Iran imefunguliwa tena kwa usafiri baada ya kufungwa kwa muda, na taarifa zinaonesha ndege za kimataifa zimeanza kuelekea katika mji mkuu wa nchi hiyo Tehran.

FlightRadar24, huduma ya mtandaoni ya ufuatiliaji wa ndege, ilithibitisha Alhamisi kuisha kwa zuio la muda la safari za anga kama ilivyoelezwa katika Taarifa ya Safari za Anga (NOTAM), na kuongeza kuwa ndege nyingi zimeonekana zikiingia katika anga ya nchi hiyo.

Iran ilifunga kwa muda anga yake kwa ndege zote isipokuwa kuwasili na kuondoka kwa ndege za kiraia za kimataifa zilizothibitishwa, ikielezea kuwa hilo lilifanywa kwa ajili ya taratibu za usalama.

Taarifa ya awali ilisema anga la Iran itaendelea kufungwa hadi 15 Januari, na kuruhusu tu ndege maalum za kiraia kufanya safari kwa kibali cha awali kutoka Mamlaka ya Usafiri wa Anga.

Hatua hiyo inakuja huku mzozo wa kikanda na wa ndani ukiongezeka, ikijumuisha maandamano ya kupinga serikali ndani ya Iran na uchunguzi wa kimataifa unaoongezeka.

Rais wa Marekani Donald Trump alisema kuwa alipelekewa taarifa za kusitishwa kwa utekelezaji wa hukumu ya kifo dhidi ya waandamanaji, huku akionya kwamba Washington inafuatilia kwa karibu.

Trump ameonesha mara kadhaa azma yake ya kuunga mkono waandamanaji na kusema kuwa Marekani inaweza kuchukua "hatua kali sana" iwapo utekelezaji wa hukumu za kifo utaendelea.

Waziri wa Mambo ya Nje wa G7 wamekemea pia "matumizi ya vurugu" dhidi ya waandamanaji, wakihimiza mamlaka kuheshimu haki za binadamu, huku wakionya kuhusu uwezekano wa kuchukuliwa kwa hatua zaidi.

Wakati huo huo, maafisa wa Iran wameituhumu Marekani na Israel kwa kuunga mkono vurugu na ugaidi unaohusishwa na maandamano hayo — madai ambayo yanakanushwa na nchi za Magharibi.

Serikali ya Iran haijatoa idadi rasmi ya waliojeruhiwa na waliopoteza maisha, wakati mashirika ya haki za binadamu yanaripoti kuuawa kwa maelfu na wengine kujeruhiwa tangu kuanza kwa maandamano mwishoni mwa mwezi Disemba.