Argentina ta doke Switzerland 3-1 a cikin ƙarin lokaci lamarin da ya kai ta matakin dab da ƙarshe a Gasar Kofin Duniya inda za ta kara da Ingila.

Alexis Mac Allister ne ya zura ƙwallo na farko a raga minti 10 da fara wasa kafin Dan Ndoye ya farke wa Switzerland ƙwallo ɗayan minti 67 da fara wasa lamarin da ya mayar da wasan kunnen doki.

Switzerland dai ta kasance a kan gaba a wasan a ɓangaren riƙe ƙwallo da kuma samar da damarmakin zura ƙwallon a raga, amma jan katin da aka bai wa Breel Embolo minti 72 da fara wasa ya karkata ƙarfin filin wasan zuwa ɓangaren Argentina.

Argentina ta samar da damarmaki ba tare da ta samu ta zura ƙwallo a raga ba, lamarin da ya kai wasan har zuwa cikin ƙarin lokaci.

Switzerland ta jure hare-haren Argentina har zuwa lokacin da Julian Alvarez ya zura ƙwallo a ragarta minti 112 da fara wasa, kafin Lautaro Martinez ya zura ƙwallo na uku a raga a ƙarshen wasan, lamarin da ya tabbatar da gurbin Argentina a wasan dab da na ƙarshe da Ingila.