Saif al-Islam Qadaafi, oo ah wiilka hoggaamiyihii geeriyooday ee Libya Mucamar Al-Qadaafi, ayaa lagu dilay magaalada Zintan ee galbeedka dalkaasi, sida ay xaqiijiyeen ilo ku dhow qoyska, qareenkiisa iyo warbaahinta maxalliga ah.

Geerida Saif al-Islam, oo 53 jir ahaa, waxaa xaqiijiyay qareenkiisa, Khaled al-Zaidi iyo la-taliyihiisa Abdullah Osman, kuwaas oo warka shaaciyay goor dambe oo habeenimadii Talaadada ahayd.

Warbaahinta Libya ayaa ku warrantay in dilka uu ka dhacay hoyga uu deganaa Saif, waxaana fuliyay afar shaqsi oo aan haybtooda la garanayn.

Wararku waxay intaas ku darayaan in kaamirooyinka ilaalada ee goobta la damiyay ka hor inta uusan weerarku dhicin.

Xafiiska Xeer Ilaaliyaha Guud ee Libya ayaa furay baaritaan la xiriira dilkan, sida ay baahiyeen warbaahinta gudaha. Si kastaba ha ahaatee, faahfaahinta rasmiga ah ee ku xeeran qaabka uu dilku u dhacay ayaa weli mugdi ku jira, iyadoo maamulka Libya aysan weli soo saarin xaqiijin rasmi ah oo dowladeed.

Muusa Ibraahim, oo ahaa afhayeenkii xukuumaddii Qadaafi, ayaa bartiisa Facebook ku qoray qoraal uu ku cambaareynayo dhacdadan: "Waxay u dileen si khiyaano ah xilli uu doonayay Libya midaysan, madaxbannaan, oo u nabdoon dhammaan dadkeeda... Waxay dileen rajadii iyo mustaqbalkii, waxayna abuureen naceyb iyo colaad."

Ibraahim ayaa intaas ku daray in ujeedka dilka uu yahay dhiig-bax horleh, kala qaybinta Libya, iyo burburinta mashruuc kasta oo midnimo qaran ah, si loogu adeego danaha shisheeyaha dalka ku sugan.

Wakaaladda Wararka Libya ayaa soo xigatay "Guutada 444-aad" oo hoostagta Wasaaradda Gaashaandhigga ee Dowladda Midnimada Qaran, kuwaas oo "si qayaxan" u beeniyay wararka lagu faafiyay baraha bulshada ee la xiriirinaya isku-dhacyada ka dhacay magaalada Zintan iyo wararka la socda ee ku saabsan dilka Saif al-Islam.

Tan iyo markii la qabtay xilligii kacdoonkii hubeysnaa ee xukunka ka tuuray aabbihiis sannadkii 2011, Saif al-Islam wuxuu ku noolaa magaalada Zintan, oo qiyaastii 136 kiiloomitir (85 mayl) dhanka koonfur-galbeed kaga beegan caasimadda Tripoli. Xitaa kadib markii la sii daayay sannadkii 2017, cidna si rasmi ah uma ogeyn goobta uu ku sugan yahay.

In kasta oo Saif al-Islam uu si weyn uga dhex muuqday dalka Waqooyiga Afrika ku yaalla, gaar ahaan doorkii uu ku lahaa qaabeynta siyaasadda ka hor 2011, haddana muuqaalkiisa fagaare ayaa sii yaraaday sannadihii u dambeeyay.

Sannadkii 2015, maxkamad ku taalla Libya ayaa xukun dil ah (in absentia) ku ridday Saif al-Islam, iyadoo lagu eedeeyay inuu caburiyay dibadbaxyadii nabadeed ee kacdoonkii 2011. Sannadkii 2021, wuxuu isku diiwaangeliyay inuu noqdo musharax madaxweyne doorashadii la filayay bishii December, taas oo markii dambe u burburtay is-mari-waa siyaasadeed dartii.