Golaha Wasiirrada Dowladda Federaalka Soomaaliya, oo uu guddoomiyay Ra’iisul Wasaare Xamza Cabdi Barre, ayaa Khamiistii yeeshay kulankoodii toddobaadlaha ahaa, iyagoo ansixiyay sharciyo iyo heshiisyo muhiim u ah dib-u-habeynta bulshada, horumarinta kaabayaasha, iyo xoojinta xiriirka caalamiga ah.
Goluhu wuxuu si aqlabiyad leh u meel mariyay Hindise-Sharciyeedka Mamnuucidda Gudniinka Fircooniga (FGM), tallaabo taariikhi ah oo lagu difaacayo xuquuqda haweenka iyo gabdhaha, laguna ciqaabayo dhaqan-gelintiisa. Sidoo kale, Golaha ayaa ansixiyay Istaraatiijiyadda Qaranka ee Haweenka, Nabadda, iyo Amniga, taas oo xoojinaysa ballanqaadka dowladda “DanQaran” ee ku aaddan ka-qaybgalka haweenka ee horumarinta dalka iyo xasilloonida.
Saddex arrimood oo kale oo muhiim ah ayaa sidoo kale la ansixiyay:
Heshiiska Isfahamka ee Soomaaliya iyo Rwanda, oo xoojinaya iskaashiga guud iyo xiriirka diblumaasiyadeed.
Istaraatiijiyadda Qaranka ee Dekedaha, oo dejinaysa hagitaan lagu casriyeynayo laguna nidaaminayo kaabayaasha badda si loo kordhiyo ganacsiga iyo dakhliga.
Heshiiska IMSO, oo oggolaanaya Soomaaliya inay ka mid noqoto waddamada ka faa’iideysta adeegyada iyo cilmi-baarista dayax-gacmeedka, ayna horumariso amniga badda iyo isgaarsiinta.
Inta lagu guda jiray kulanka, waxaa sidoo kale lagu lafa-guray xaaladda bini’aadanimo ee dalka. Guddoomiyaha Hay’adda Maareynta Musiibooyinka (SoDMA), Mudane Mahamuud Moallim Cabdulle, ayaa soo bandhigay warbixin faahfaahsan oo ku saabsan abaarta, isagoo sheegay in ku dhowaad 4.4 milyan qof ay u baahan yihiin gargaar degdeg ah.
Ra’iisul Wasaare Xamza ayaa faray dhammaan hay’adaha dowladda ee khuseeya inay dedejiyaan gurmadka, isagoo ku adkeeyay in gargaarka si degdeg ah loo gaarsiiyo dadka ugu daran, kana dhigay badbaadinta nolosha mudnaanta koowaad ee dowladda.
Goluhu wuxuu sidoo kale dhageystay warbixinno ku saabsan amniga guud ee dalka iyo natiijooyinka ka soo baxay Shirkii Garsoorka Soomaaliyeed.
