Migomo ya wanafunzi iliendelea kote nchini Ufaransa siku ya Jumatatu, huku masomo yakisitishwa kikamilifu au kwa sehemu katika shule za sekondari kati ya 400 na 500 kutokana na maandamano kuhusu hali ya elimu na ongezeko la matukio yanayohusiana na suala hilo, kulingana na shirika la utangazaji la BFMTV.

Idadi hiyo inawakilisha takriban asilimia 10 hadi 13 ya shule za sekondari 3,700 nchini Ufaransa, alisema Waziri wa Elimu Edouard Geffray, akitaja hofu ya kiusalama katika shule hizo zilizoathirika.

Migomo hiyo, iliyoanza katika eneo la Paris katikati ya mwezi wa Septemba, ilishika kasi wiki iliyopita huku wanafunzi wakidai rasilimali zaidi, majengo ya shule yaliyotunzwa vyema, madarasa yenye idadi ndogo ya wanafunzi, na hatua za kushughulikia uhaba wa wafanyakazi.

Katika eneo la Ile-de-France linalozunguka Paris, zaidi ya shule za sekondari 160 zilitarajiwa kufungwa siku ya Jumatatu, kulingana na mamlaka za eneo hilo.

Harakati hizo ziliambatana na matukio kadhaa jijini Paris.

Katika Shule ya Sekondari ya Vauquelin jijini, mamlaka ziliripoti matukio matatu ya moto karibu na lango la kuingilia shuleni humo Jumatatu asubuhi.

Mkuu wa shule hiyo aliwajulisha polisi baada ya moto wa kwanza kuripotiwa majira ya saa moja asubuhi kwa saa za huko, hatua hiyo ilisababisha kikosi cha zimamoto kuingilia kati na wanafunzi pamoja na wafanyakazi kuzuiwa ndani ya jengo hilo.

Inaripotiwa kuwa takriban wanafunzi 100 waliondolewa shuleni humo kufuatia tukio hilo.

Shule kadhaa "zimeteketezwa kwa moto au kuharibiwa na kuporwa"

Wakati huo huo, wanafunzi walianza kuzuia yeyote kuingia na kutoka katika Shule ya Sekondari ya Turgot jijini Paris mapema Jumatatu, wakitumia mapipa ya taka, ua na mabango kuzuia njia.

Wizara ya Mambo ya Ndani na Wizara ya Elimu zimeripoti ongezeko kubwa la idadi ya watu waliokamatwa na kujeruhiwa tangu maandamano hayo ya shinikizo yalipoanza.

Mamlaka zilisema takriban watu 5,000 wamekamatwa tangu kuanza kwa vuguvugu hilo, huku asilimia 85 kati yao wakiwa ni vijana walio chini ya umri wa miaka 18 katika eneo la Ile-de-France.

Kwa mujibu wa Waziri wa Elimu, shule 24 "zimeteketezwa kwa moto au kuharibiwa na kuporwa," huku wafanyakazi 78 wa Wizara ya Elimu na takriban maafisa 600 wa polisi na jeshi la polisi (gendarmes) wakijeruhiwa.

Waziri huyo pia alisema wanafunzi 170 wamejeruhiwa tangu maandamano hayo yalipoanza.

Idara ya Ukaguzi Mkuu wa Polisi ya Taifa nchini Ufaransa imeanzisha uchunguzi wa matukio matano yanayohusiana na vuguvugu hilo la maandamano.

Waziri Mkuu Francois Bayrou anajaribu kutatua mgogoro huo kwa kuwasilisha mapendekezo matano na ametoa wito wa kufikiwa kwa maamuzi kabla ya mwisho wa mwezi Oktoba.