Wani babban ɗan majalisar dokokin Iran ya yi gargaɗin cewa duk wani sa hannun Amurka wajen yin zirga-zirgar jiragen ruwa ta Mashigar Hormuz zai zama keta yarjejeniyar tsagaita wuta, inda ya yi watsi da abin da Amurka take shirin yi a hanyar ruwan.

Ibrahim Azizi, shugaban kwamitin tsaro na ƙasa da manufofin ƙetare na majalisar dokokin Iran, ya bayyana cewa “duk wani katsalandan na Amurka a cikin sabon tsarin zirga-zirgar ruwa a Mashigar Hormuz za a ɗauke shi a matsayin keta yarjejeniyar tsagaita wuta”.

A wani rubutu da ya yi a dandalin X, ya yi watsi da ra’ayin cewa Amurka za ta iya tafiyar da hanyar ruwan, yana mai cewa ba za a gudanar da Mashigar Hormuz da Tekun Fasha ta hanyar saƙonnin shugaban Amurka ba.

“Babu wanda zai yi imani da dabarun wasan kwaikwayo na ɗora wa juna laifi!” in ji shi.

Waɗannan kalamai sun biyo bayan kalaman Trump a ranar Lahadi cewa Amurka za ta ɗauki matakin jagorantar jiragen ruwan da suka maƙale a Mashigar Hormuz don fita daga hanyoyin ruwa da aka taƙaita.

Masu AlakaTRT Afrika - Iran ta ba Amurka wata guda don janye toshe tashoshin ruwanta da kawo ƙarshen yaƙin Iran da Lebanon

A wani rubutu da ya yi a dandalin Truth Social, Trump ya bayyana matakin a matsayin “tallafin jinƙai” da nufin taimaka wa ƙasashe waɗanda ba su da hannu a yaƙin Amurka da Isra’ila kan Iran.

“Domin jin daɗin Iran, Gabas ta Tsakiya, da Amurka, mun gaya wa waɗannan ƙasashe cewa za mu jagoranci jiragensu lafiya daga waɗannan hanyoyin ruwa da aka taƙaita,” in ji shi.

“Shirin kare kai”

A gefe guda kuma, Rundunar Sojin Amurka ta Tsakiya (CENTCOM) ta ce dakarunta za su fara goyon bayan aikin Project Freedom a ranar 4 ga watan Mayu don dawo da ’yancin zirga-zirgar jiragen ruwan kasuwanci ta Mashigar Hormuz.

Kashi ɗaya cikin huɗu na cinikin man fetur na duniya ta teku, da kuma adadi mai yawa na man fetur da takin zamani ana safarar su ne ta wannan mashiga.

“Goyan bayanmu ga wannan shiri na kare kai yana da mahimmanci ga tsaron yankin da kuma tattalin arzikin duniya yayin da muke ci gaba da toshe hanyoyin ruwa na soja,” in ji Admiral Brad Cooper, kwamandan CENTCOM.

Goyan bayan sojan Amurka ga aikin Project Freedom zai haɗa da jiragen yaƙi masu harba makamai masu linzami, sama da jiragen sama 100 na ƙasa da teku, na’urorin zamani masu sarrafa kansu, da kuma dakarun soja 15,000.