Lilian Odira wa Kenya alimshinda bingwa wa Olimpiki Keely Hodgkinson na kushinda taji la mbio za wanawake za mita 800 kwenye mashindano ya dunia yaliyofanyika Tokyo Jumapili.
Odira aliweka rekodi ya mashindano – na muda bora zaidi wa kibinafsi – wa dakika 1:54.62 kwa ushindi, akivunja rekodi ya awali kwa sekunde 0.06 iliyowekwa na Jarmila Kratochvilova wa Czechoslovakia ya zamani huko Helsinki mwaka 1983.
Georgina Hunter Bell alishinda medali ya fedha kwa muda bora wa kibinafsi wa 1:54.90 katika ushindani wa karibu na mwenzake wa Uingereza na mshirika wake wa mazoezi Hodgkinson, ambaye alilazimika kuridhika na medali ya shaba.
Hodgkinson, ambaye ameshinda medali za fedha kwenye mashindano mawili ya dunia yaliyopita, alikuwa kipenzi cha wengi kuibuka mshindi wa mbio hizo licha ya kuwa na muda mdogo wa mazoezi uwanjani.
Mbio za kasi sana
Mwanariadha huyo mwenye umri wa miaka 23 alikiri kuwa alikuwa na wasiwasi kuhusu nafasi yake kwenye mashindano ya dunia hadi dakika za mwisho kwa sababu alikosa kushiriki kwa miezi kadhaa kutokana na majeraha ya msuli wa paja baada ya kushinda dhahabu ya Olimpiki jijini Paris majira ya kiangazi mwaka jana, na alirejea kwenye mbio mwezi Agosti.
Katika mbio za kasi sana, bingwa mtetezi wa dunia Mary Moraa wa Kenya aliongoza mbio, huku Hodgkinson akifuata karibu naye.
Kwenye kengele ya mwisho, Hodgkinson alizuiwa njia na Audrey Werro wa Uswisi aliyempita, lakini alijitahidi kupenya kwenye njia ya ndani ili kuendelea kushindana.
Kwa mita 200 zilizobaki, Hodgkinson hatimaye alimzidi Moraa upande wa ndani huku kundi likigawanyika.
Medali ya kwanza ya dunia kwa Lilian Odira
Hunter Bell alimfuata, na kwa mita 40 za mwisho ilionekana kama Uingereza ingeibuka na ushindi wa 1-2 katika Uwanja wa Kitaifa wa Tokyo.
Lakini hawakutarajia kasi ya kumalizia ya Odira, ambaye aliwapita kwa kasi na kushinda dhahabu kwa mshangao.
Ilikuwa medali ya kwanza ya dunia kwa mwanariadha huyo wa miaka 26 kutoka Kenya, ambaye aliishia nusu fainali kwenye Olimpiki za Paris na kushinda fedha kwenye Michezo ya Afrika mwaka jana.
Aliweka rekodi yake ya awali ya kibinafsi ya 1:56.52 alipoibuka wa pili nyuma ya Hodgkinson kwenye mashindano ya Diamond League ya Silesia mwezi uliopita.
