Washukiwa wa ugaidi wameshambulia mgodi wa dhahabu wa Morila nchini Mali mwishoni mwa wiki, kuchoma vifaa na kuwateka wafanyakazi saba kabla ya kuwaachilia baadaye, afisa mmoja wa wizara ya madini aliaambia Reuters Jumatatu.

Mashambulizi hayo yanaonesha hatari ya usalama inayoongezeka nchini Mali, mzalishaji mkubwa wa tatu wa dhahabu barani Afrika, ambayo inakabiliana na magaidi wenye uhusiano na al Qaeda waliolenga uwekezaji wa kigeni na raslimali zingine.

Siku ya Jumamosi, watu waliokuwa na silaha walivamia mgodi, ambapo kampuni yenye makao yake Marekani Flagship Gold ilitia saini ya uwekezaji mwaka uliopita, msemaji wa wizara ya madini na mtu mwingine anayefahamu kuhusu hilo alisema.

Walichoma vifaa na kuwateka wafanyakazi saba, lakini waliwaachilia siku ya pili jioni, vyanzo hivyo vilisema. Wote waliomba majina yao yasitambulishwe.

'Hali imedhibitiwa'

Kampuni ya Flagship Gold haikutoa taarifa haraka kuhusu hilo ilipoombwa kuzungumzia suala hilo.

Msemaji wa wizara anasema kuwa jeshi sasa limechukuwa udhibiti na linafanya msako katika eneo hilo.

Kampuni hiyo yenye makao yake jijini New York ya Flagship Gold, ambayo ilisajiliwa mwezi Juni 2024, ilitia saini ushirikiano wa makubaliano na kampuni ya madini ya serikali ya Mali mwezi Oktoba kuanza uchimbaji madini katika mgodi wa dhahabu wa Morila.

Mgodi huo ulioko katika kanda ya kusini ya Mali ya Sikasso, una zaidi ya tani 70 za dhahabu, kulingana na wizara ya madini.

Ulichukuliwa na serikali baada ya kampuni ya Australia Firefinch kuacha kuchimba kutokana na uzalishaji mdogo na gharama kubwa za uchimbaji. Zamani mgodi wa Morila ulikuwa ukichimbwa na Barrick na AngloGold Ashanti.