Madaxweynaha Turkiga Recep Tayyip Erdogan iyo Madaxweynaha Ruushka Vladimir Putin ayaa Arbacadii khadka telefoonka kaga wada hadlay xiriirka labada dal iyo arrimo kala duwan oo heer gobol iyo caalami ah, sida ay sheegtay Madaxtooyada Isgaarsiinta Turkiga.
Erdogan ayaa carrabka ku adkeeyay muhiimadda ay leedahay sii wadista dadaallada lagu xaqiijinayo badbaadada isu-socodka maraakiibta ee Badda Madow, sida lagu sheegay bayaan ay hay’addu ku baahisay barta bulshada Turkiga ee NSosyal.
Turkiga oo taageeraya xiriir toos ah oo dhex mara Ruushka iyo Ukraine
Erdogan ayaa sheegay in Turkigu weli diyaar u yahay inuu gacan ka geysto dadaallada lagu abuurayo xiriir toos ah oo dhex mara Ruushka iyo Ukraine, isagoo mar kale xaqiijiyay doorka ay Ankara sheegtay inay ka qaadan karto fududeynta wada-hadallada labada dhinac.
Labada hoggaamiye ayaa sidoo kale is dhaafsaday aragtiyo ku saabsan xiriirka labada dal iyo horumarrada guud ee gobolka iyo caalamka, inkastoo bayaanku uusan faahfaahin dheeraad ah ka bixin arrimaha laga wada hadlay.
Intii uu socday wada-hadalka telefoonka, Erdogan ayaa Putin ugu hambalyeeyay dhalashadiisa iyo guusha xisbigiisa ee doorashooyinka Golaha Duma ee Ruushka.
