Golaha Wasiirrada Xukuumadda Federaalka Soomaaliya ayaa Khamiistii yeeshay kulankoodii toddobaadlaha ahaa, oo uu shir-guddoominayay Ra’iisul Wasaare Xamza Cabdi Barre, iyagoo dib u eegay warbixinno ku saabsan amniga, caafimaadka, doorashooyinka, ganacsiga iyo arrimo kale oo muhiim u ah dalka.
Wasaaradda Arrimaha Gudaha, Federaalka iyo Dib-u-heshiisiinta ayaa Golaha Wasiirrada warbixin ka siisay doorashooyinkii qof iyo cod ee lagu qabtay dowlad-goboleedyada Galmudug iyo Hirshabeelle, kuwaas oo si guul leh ku soo dhammaaday. Golaha Wasiirrada ayaa bogaadiyay ka-qaybgalka dadweynaha ee geeddi-socodka dimuqraadiyadda, taas oo qayb ka ah dadaallada dowladda ee hirgelinta Dastuurka.
Kulanka ayaa sidoo kale dib loogu eegay faa’iidooyinka ay Soomaaliya ka heshay xubinnimada Bulshada Bariga Afrika (EAC), oo ay ka mid yihiin in ardayda Soomaaliyeed ay jaamacadaha gobolka wax kaga baran karaan kharashaadka waxbarasho ee laga qaado ardayda dalalka xubnaha ka ah, iyo in laga dhaafo lacagaha dalxiiska ee laga qaado ajaanibta.
Golaha Wasiirrada ayaa sidoo kale lagu wargeliyay in ganacsatada iyo xirfadlayaasha Soomaaliyeed ay heleen fursado ballaaran oo ay kaga shaqeyn karaan dalalka xubnaha ka ah EAC, iyaga oo aan lagu soo rogeyn qaar ka mid ah xayiraadaha lagu soo rogo muwaadiniinta ajnabiga ah.
