Kamfanin dillancin labarai na AFP ya rawaito cewa, masu binciken tarihi da ke gudanar da tonon kayan tarihi a makabartar Thiaroye da ke Dakar, Senegal, sun gano alamun kisan gillar da sojojin mulkin mallaka na Faransa suka yi wa sojojin Afirka a lokacin yakin duniya na biyu.
Kisan gillar da aka yi a watan Nuwamban 1944 ya shafi sojoji daga wasu ƙasashen Yammacin Afirka da aka aika zuwa sansanin Thiaroye da ke da nisan kilomita 15 daga Dakar.
Ba a jima ba sojojin Afirka suka nuna rashin gamsuwa saboda rashin biyan albashi da kuma buƙatun da ba a cika ba na a yi musu magani daidai yadda ake yi wa sojoji fararen fata. A ranar 1 ga Disamba, sojojin Faransa suka buɗe musu wuta.
Adadin sojojin da aka kashe, da wurin da aka binne su duk ba a fayyace ba, inda Senegal ta zargi Faransa da ɓoye gaskiyar lamarin.
Shaidar kisan gilla
"Masana kayan tarihi sun gano kwarangwal guda bakwai. Wannan muhimmin mataki ne a neman gaskiyar tarihi da ake yi. Wani ƙwarangwal yana ɗauke da harsashi a gefen hagu a wurin da zuciya take," in ji daraktan adana kayan tarihi na sojojin Senegal, Kanal Saliou Ngom.
"Wasu kuma ba su da kashin baya, haƙarƙari ko kwanyar kai. Wasu mutanen an binne su da sarƙoƙin ƙarfe a wuyayensu. Wannan yana nufin sun fuskanci tashin hankali," in ji shi.
Kaburburan da aka binne gawarwakin sun fi zama sabbi sama da gawarwakin, in ji Sall.
"Wani zargin na daban shi ne cewa an yi kaburburan bayan binnewar farko ko kuma an shirya shi don a nuna cewa an binne su yadda ya kamata," in ji Sall.
Gawarwakin da ba a san da su ba
Ba a san ko su waye ainihin wanda ke cikin dukkan kaburburan ba, ko kuma ko akwai gawarwaki a kowane wajen da aka yi wa alama. Masu binciken sun sami damar tono ƙaramin kashi ne kawai daga cikinsu.
Faransa da ta yi mulkin mallaka ce ta samar da makabartar a shekarar 1926 don binne sojojin Afirka. Wasu masu bincike sun yi imanin cewa an binne mayakan da aka kashe a kisan kiyashin Thiaroye a wajen.
Senegal ta yi zargin cewa yana da wahala samun bayanan gano ta’annatin Turawan mulkin mallaka na Faransa wajen yin kisan kiyashi a ƙasar.
Masu binciken kayan tarihi sun gudanar da binciken farko a ƙarƙashin ɗaya daga cikin manyan bishiyoyin kuka biyu, waɗanda za su iya nuna wurin da aka binne gawarwakin.
Mummunan laifin da aka shirya aikata wa
Masu binciken sun gabatar da wani rahoto a hukumance a ranar 16 ga Oktoba ga Shugaban Senegal Bassirou Diomaye Faye, inda suka bayyana kisan gillar a matsayin "wanda aka tsara" kuma aka ɓoye shi, tare da janyo asarar rayuka da aka yi watsi da su sosai.
Hukumomin mulkin mallaka na Faransa a lokacin kisan gillar sun ce an kashe masu ɗauke da bindiga har 70 a lokacin Yaƙin Duniya na Biyu.
Amma masu binciken sun ce alkaluman da suka fi inganci sun nuna cewa adadin ya kusa kai wa 300 zuwa 400, gami da wasu daga cikin mutanen da aka binne a maƙabartar Thiaroye.
Shugaba Faye, wanda ya yi alƙawarin kare sadaukantakar sojojin, ya sanar da cewa ya amince da "ci gaba da tonon kayan tarihi a duk wuraren da kaburburan suke".
A watan Nuwamban 2024, yayin shirin tarukan cika shekaru 80 da kisan gillar, Shugaban Faransa Emmanuel Macron ya amince cewa sojojin mulkin mallaka na Faransa sun aikata "kisan kiyashi" a Thiaroye.
