Agaasimaha Warfaafinta ee dalka Turkiga, Burhanettin Duran, ayaa cambaareeyay ku dhawaaqista Israa'iil ee aqoonsiga gobolka Somaliland oo ay u aqoonsatay maamul madax-bannaan, isagoo tallaabadaas ku tilmaamay xad-gudub cad oo ka dhan ah sharciga caalamiga ah.
Qoraal uu soo dhigay bartiisa X ayuu Duran ku sheegay in go’aankani uu la macno yahay faragelin toos ah oo lagu sameeyay arrimaha gudaha ee Soomaaliya, isla markaana uu wiiqayo madax-bannaanida iyo midnimada dhuleed ee dalka.
Wuxuu ka digay in tallaabadani ay sii murgineyso xaaladda siyaasadeed iyo amni ee jilicsan ee ka jirta Geeska Afrika.
"Tallaabadani waxay beegsanaysaa madax-bannaanida iyo midnimada dhuleed ee Soomaaliya, waxayna xaaladda xasaasiga ah ee gobolka ka dhigaysaa mid aad u jilicsan," ayuu Duran ku sheegay bartiisa X.
Duran ayaa dhaliilay tallaabadan oo uu ku sifeeyay mid qayb ka ah waxa uu ugu yeeray "siyaasadaha mas’uuliyad-darrada ah" ee xukuumadda Netanyahu, isagoo xusay in ficillada noocan ah ay sii dhaawacayaan dadaallada lagu doonayo nabadda iyo xasiloonida gobolka.
Isagoo ku baaqaya tallaabo caalami ah, Duran wuxuu sheegay in beesha caalamku ay tahay inay mowqif midaysan ka qaadato hindisayaasha sii hurinaya xiisadaha, isla markaana kordhinaya khataraha amni ee Geeska Afrika.
Ugu dambeyntii, isagoo dib u xaqiijinaya mowqifka Ankara, wuxuu carrabka ku adkeeyay in Turkigu uu sii wadi doono garab istaagga adag ee uu u hayo qaranimada Soomaaliya. "Turkigu wuxuu si hagar la'aan ah u sii wadi doonaa taageerada uu u hayo madax-bannaanida iyo midnimada dhuleed ee walaalahayo Soomaaliya," ayuu raaciyay qoraalkiisa.
