Shan qof ayaa ku dhintay kadib markii diyaarad nooca qumaatiga u kaca ah oo ku jirtay hawgal samatabixin ah ay ku dhacday Buurta Kilimanjaro ee dalka Tanzania, xilli ay waddey daadgureyn caafimaad, sida laga soo xigtay booliska dalkaas.
Taliyaha Booliska Gobolka Kilimanjaro, Simon Maigwa, ayaa sheegay in shilku uu dhacay Khamiistii qiyaastii 11:30 subaxnimo waqtiga Bariga Afrika, xilli ay diyaaraddu ku sii jeedday inay soo qaado bukaano buurta fuulayay iyada oo loo marayo shirkadda dalxiiska ee Boby Camping.
Diyaaraddu waxay ku dhacday aag sare oo buurta ah oo u dhexeeya Kibo Hut iyo Barafu Camp, oo ah mid ka mid ah waddooyinka ugu dambeeya ee loo maro fuulitaanka buurta ugu dheer Afrika, taas oo dhererkeedu yahay mid qiyaastii 5,895 mitir (19,341 feet) ka sarreeya badda.
Maigwa ayaa sheegay in dadkii ku dhintay ay ahaayeen laba ajaanib ah, hage dalxiis, duuliyaha diyaaradda iyo dhakhtar ka tirsanaa kooxda samatabixinta. Lama soo sheegin cid ka badbaaday shilka.
Buurta Kilimanjaro, oo ah goob dalxiis oo weyn, ayaa si joogto ah ugu tiirsan diyaarado qumaatiga u kaca si loo badbaadiyo fuulayaal la kulma xanuunka baqdinta joogga sare ama dhaawacyo inta ay ku sii jeedaan figta buurta.
Aagga shilku ka dhacay waxaa lagu yaqaannaa dabeyl khafiif ah iyo cimilo si degdeg ah isu beddesha, taas oo adkayn karta hawlgallada samatabixinta.
Kooxo gurmad ah ayaa loo diray goobta shilka, waxaana la bilaabay baaritaan lagu ogaanayo sababta keentay shilka.
