Ururka Midowga Afrika (AU) ayaa si adag u diiday tallaabada ay Israa'iil ku aqoonsatay gobolka Somaliland inay tahay maamul madax-bannaan, wuxuuna dib u xaqiijiyay taageerada uu u hayo midnimada, madax-bannaanida, iyo bedqabka dhuleed ee Soomaaliya.
War-saxaafadeed uu Jimcihii soo saaray Nuur Maxamuud Sheekh, Afhayeenka Guddoomiyaha Guddiga Midowga Afrika, ayuu Guddoomiyaha Guddiga Midowga Afrika, Maxamuud Cali Yuusuf, ku sheegay inuu "walaac qoto dheer" ka muujiyay horumarradii ugu dambeeyay ee ku saabsan Somaliland, isagoo carrabka ku adkeeyay in mowqifka Midowga Afrika uu yahay mid soo jireen ah oo aan isbeddelin.
"Gobolka Somaliland wuxuu ahaanayaa qayb aan la kala jarayn oo ka mid ah Jamhuuriyadda Federaalka Soomaaliya," ayuu yiri Yuusuf. "Isku day kasta oo lagu wiiqayo midnimada, qaranimada iyo bedqabka dhuleed ee Soomaaliya wuxuu ka hor imaanayaa mabaadi'da asaasiga ah ee Midowga Afrika, wuxuuna halis ugu jiraa inuu horseedo jid khatar ah oo saameyn fog ku yeesha nabadda iyo xasiloonida qaaradda oo dhan."
Bayaanka ayaa daliishaday Sharciga Aasaasiga ah ee Midowga Afrika iyo go'aankii Ururka Midowga Afrika (OAU) ee sannadkii 1964-kii, kaas oo qeexaya in la ixtiraamo xuduudihii laga dhaxlay isticmaarka xilligii xorriyadda.
Yuusuf ayaa sheegay in aqoonsi kasta oo Somaliland loogu aqoonsado dowlad gaar ah uu "si toos ah uga hor imaanayo mabaadi'da aasaasiga ah ee Midowga Afrika."
Midowga Afrika ayaa sidoo kale ku celiyay taageerada uu u hayo dadaallada socda ee Soomaaliya ay ku xoojineyso nabadda, dhismaha hay'adaha dowladda, iyo horumarinta dowladnimo loo dhan yahay, isagoo ka digay in dadaallada aqoonsiga ee hal dhinac ah ay sii hurin karaan xiisadaha siyaasadeed iyo kuwa amni ee ka jira Geeska Afrika.
Mowqifka Midowga Afrika ayaa la jaanqaadaya mowqifyadii ay horey u muujiyeen Dowladda Federaalka Soomaaliya, urur goboleedyada iyo saaxiibbada caalamka, kuwaas oo si adag u diiday aqoonsiga hal dhinac ah ee Somaliland.
Soomaaliya, oo xubin aasaase ah ka ah Midowga Afrika, ayaa muddo dheer ku nuuxnuuxsatay in go'aannada la xiriira qaranimadeeda iyo midnimadeeda dhuleed ay yihiin xaq u gaar ah shacabkeeda.
