Guddoomiyaha Guddiga Madaxa Bannaan ee Doorashooyinka iyo Soohdimaha Qaranka, Cabdikarin Axmed Xasan, ayaa ku dhawaaqay in codbixintii Doorashooyinka Golaha Deegaanka Gobolka Banaadir ay si guul leh oo nabad ah ku soo dhammaatay, kadib markii ay bilaabatay 6:00 subaxnimo isla markaana si rasmi ah loo xiray 6:00 fiidnimo Talaadadii.
Isagoo la hadlayay warbaahinta qaranka wax yar kadib xiritaanka goobaha codbixinta, Guddoomiyuhu wuxuu sheegay in geeddi-socodka doorashadu uu u dhacay si degan oo nidaamsan, isla markaana ay ka qaybgaleen muwaadiniin tiro badan oo ka kala socday dhammaan qaybaha bulshada, oo ay ku jireen odayaal, dhalinyaro, haween iyo hoggaamiyeyaal siyaasadeed, kuwaas oo si habsami leh u dhiibtay codkooda intii ay socotay maalinta.
Guddoomiye Cabdikarin ayaa sheegay in tirinta codadka ay bilaaban doonto saacadaha soo socda, isla markaana si hufan loo fulin doono, iyadoo ay goob joog ka noqon doonaan wakiillo ka socda ururrada siyaasadeed, bulshada rayidka ah iyo xubno ka tirsan beesha caalamka. Wuxuu carrabka ku adkeeyay in Guddiga Doorashooyinku uu si joogto ah dadweynaha ula wadaagi doono warbixinno ku saabsan horumarka tirinta.
“Codbixintu waxay caawa ku soo dhammaatay si nabad ah, waxaana hadda bilaabanaya tirinta codadka. Goob joogayaal iyo wakiillo caalami ah ayaa ka qayb qaadan doona dhammaan marxaladaha geeddi-socodka, kaas oo la filayo inuu qaato waqti kooban,” ayuu yiri.
Gunaanadkii hadalkiisa, Guddoomiyuhu wuxuu uga mahadceliyay Ciidanka Booliska Soomaaliyeed, shaqaalaha doorashada, warbaahinta qaranka iyo tan madaxa bannaan, codbixiyeyaasha, iyo dhammaan dhinacyadii ka qayb qaatay hirgelinta doorashooyin si guul leh oo hufan u qabsoomay.
