Shiinaha ayaa Isniintii sheegay inuu u diri doono gargaar caafimaad oo degdeg ah Jamhuuriyadda Dimuqraadiga ah ee Congo (DRC) si looga hortago safmarka cudurka Ebola.

“Dowladda Shiinaha waxay go’aansatay inay siiso Jamhuuriyadda Dimuqraadiga ah ee Congo (DRC) gargaar bani’aadantinimo oo degdeg ah, gaar ahaan inay dirto kooxo khubaro caafimaad ah si ay u bixiyaan adeegyo iyo taageero caafimaad,” ayuu Afhayeenka Wasaaradda Arrimaha Dibadda Shiinaha, Lin Jian, u sheegay weriyeyaasha magaalada Beijing.

“Waxaan la qeybsaneynaa Jamhuuriyadda Dimuqraadiga ah ee Congo murugada ka dhalatay safmarkii ugu dambeeyay ee Ebola,” ayuu yiri Lin, isagoo intaas ku daray in Shiinuhu uu taageero siinayo Guddiga Midowga Afrika ee la-dagaallanka Ebola iyo sidoo kale Xarunta Afrika ee Xakamaynta iyo Ka Hortagga Cudurrada (Africa CDC).

Ugu yaraan 134 kiis oo Ebola ah oo la xaqiijiyay ayaa laga diiwaangeliyay safmarka hadda ka socda Congo iyo Uganda, sida lagu sheegay warbixintii ugu dambeysay ee Ururka Caafimaadka Adduunka (WHO) oo la soo saaray Jimcihii.

Tirada dhimashada Ebola ayaa gaartay 18 qof oo ka mid ah kiisaska la xaqiijiyay ee labada dal.

Mas’uuliyiinta caafimaadka Congo ayaa sheegay in wali la diiwaangelinayo kiisas cusub oo laga shakisan yahay, iyadoo tirada guud ee kiisaska la diiwaangeliyay ay ka badan tahay 1,000 qof, tan iyo markii cudurka lagu dhawaaqay 15-kii May.

Nooca Bundibugyo ee Ebola ayaa si weyn uga jira saddex gobol oo ku yaalla bariga Congo, kuwaas oo kala ah Ituri, North Kivu, iyo South Kivu.

“Xilligan aan hadlayno, kooxaha caafimaadka ee Shiinaha ayaa goobta jooga iyagoo la dagaallamaya cudurka Ebola,” ayuu yiri afhayeenka Wasaaradda Arrimaha Dibadda Shiinaha, Lin, isagoo intaas ku daray in ka badan 45 kooxood oo caafimaad oo ka socday Shiinaha ay booqdeen dalal Afrikaan ah sannadihii la soo dhaafay.

Dhanka kale, Agaasimaha Guud ee WHO, Tedros Adhanom Ghebreyesus, ayaa ugu baaqay dalalka soo rogay xayiraadaha safarka isla markaana xiray xuduudahooda kadib safmarka Ebola ee Congo iyo Uganda inay dib uga fiirsadaan tallaabooyinkaas.

Kanada iyo Mareykanka ayaa soo rogay xayiraado safar iyo hakinta fiisooyinka dadka degan Congo, Uganda, iyo Koonfurta Suudaan, iyagoo sabab uga dhigay cudurka.

Rwanda iyo Uganda ayaa sidoo kale xaddiday safarrada ka imanaya Congo inkastoo ay xuduud la wadaagaan dalkaas.