Djibouti inaingia katika msimu muhimu wa kisiasa, huku hatua za msingi katika mifumo yake ya kisheria na vyama vya siasa zikitarajiwa kuunda sura ya kisiasa kuelekea uchaguzi wa urais uliopangwa kufanyika Aprili 2026.
Bunge la taifa linatarajiwa kufanya kura muhimu kuhusu mabadiliko ya katiba mwishoni mwa wiki hii, tukio litakalofuatiwa na mkutano maalum wa chama tawala cha ‘Rassemblement Populaire pour le Progrès (RPP)’ kilicho madarakani kwa muda mrefu, mapema Novemba.
Mpangilio huu wa kimkakati unaashiria kipindi cha maandalizi makubwa ya kitaasisi huku uongozi wa kisiasa wa nchi ukijiandaa kwa mzunguko mpya wa uchaguzi.
Mchakato wa marekebisho ya katiba ulianza rasmi Jumatano wakati bunge liliporejelea kikao chake cha kawaida, kilichohudhuriwa na Waziri Mkuu Abdoulkader Kamil Mohamed na mawaziri wake.
Mwisho wa kikao hicho, Spika Dileita Mohamed Dileita alitangaza kuwa kutakuwa na kikao maalum Jumapili, Oktoba 26, kitakachojikita pekee katika kujadili na kupiga kura kuhusu marekebisho hayo ya katiba.
Akitilia mkazo umuhimu wa mchakato huo, spika alisisitiza kwamba kura hiyo lazima izingatie viwango vya kisheria vya idadi ya wabunge wanaohitajika na uungwaji mkono wa wengi ili kuhakikisha uhalali wa matokeo.
Ingawa maudhui kamili ya mapendekezo hayajafichuliwa, muda wake umeibua tafsiri kwamba huenda yakawa na athari kubwa katika kinyang’anyiro cha urais cha mwaka 2026.
“Marekebisho haya ya katiba ni hatua muhimu na ya kihistoria katika siasa na taasisi za Jamhuri yetu,” alisema Spika Dileita, akiwataka wabunge kuonyesha mfano mzuri katika kushiriki mchakato huo.
Baada ya kura ya bunge, chama cha RPP – ambacho kimekuwa na ushawishi katika siasa za Djibouti tangu kuanzishwa kwake mwaka 1979 – kitafanya mkutano wake maalum mnamo Novemba 8 katika Palais du Peuple.
Mkutano huo unatarajiwa kuwa fursa muhimu kwa uongozi wa chama na wanachama wake wa ngazi ya chini kuimarisha mkakati wao kuelekea uchaguzi ujao.
Mkutano huo utaongozwa na Rais Ismail Omar Guelleh, ambaye amekuwa akiongoza taifa na chama hicho tangu mwaka 1999.
Viongozi wote wakuu wa chama wanatarajiwa kuhudhuria, wakiwemo Waziri Mkuu Abdoulkader Kamil Mohamed, ambaye pia ni makamu wa rais wa RPP, na Ilyas Moussa Dawaleh, katibu mkuu mwenye ushawishi mkubwa wa chama hicho.
Kama chama kinachoongoza ndani ya muungano wa UMP (Union for the Presidential Majority) unaotawala, maamuzi yatakayofikiwa katika mkutano huu yatakuwa na athari pana katika mwelekeo wa kisiasa wa nchi.
Matokeo ya kura ya mabadiliko ya katiba Jumapili bila shaka yataathiri ajenda na mwelekeo wa majadiliano ya chama katika mkutano wa wiki mbili baadaye.
