Wafdi Soomaaliyeed oo uu hoggaaminayo Maareeyaha Guud ee Dekedda Muqdisho, Danjire Maxamed Cali Nuur (Americo), ayaa 26-dii ilaa 30-kii Sebteembar 2026 booqasho shaqo ku tagay magaalada Trieste ee gobolka Friuli Venezia Giulia ee Talyaaniga, si loo xoojiyo iskaashiga dhinacyada saadka dekedaha, waxbarashada iyo horumarinta xirfadaha dhallinyarada Soomaaliyeed.
Booqashada ayaa ku timid casuumaad uu fidiyay Dr. Ahmed Faghi Elmi, Guddoomiyaha ANOLF FVG APS, iyadoo qayb ka ah mashruuca FORLIS oo uu taageerayo Gobolka Friuli Venezia Giulia.
Intii ay booqashadu socotay, wafdiga ayaa kulamo la yeeshay hay’adaha Gobolka Friuli Venezia Giulia, Golaha Gobolka, Dowladda Hoose ee Trieste, Prefettura, Akadeemiyadda Badda Adriatico iyo Dekedda Trieste. Wadahadallada ayaa sidoo kale lagu soo qaaday fursadaha iskaashi ee mustaqbalka, oo ay ku jirto suurtagalnimada in Dekedda Muqdisho iyo Dekedda Trieste la mataaneeyo.
Mashruuca FORLIS, 14 dhallinyaro Soomaaliyeed ah oo isugu jira toddobo haween ah iyo toddobo rag ah ayaa la filayaa inay qaataan barnaamij waxbarasho iyo tababar oo laba sano ah oo ku saabsan saadka iyo hawlaha dekedaha, kaas oo ku bilaabanaya barashada afka Talyaaniga ee Muqdisho.
Booqashada ayaa sii xoojisay iskaashiga u dhexeeya hay’adaha Soomaaliya iyo Gobolka Friuli Venezia Giulia, iyadoo diiradda la saarayo waxbarashada, tababarrada xirfadaha, badbaadada goobaha shaqada, saadka dekedaha iyo fursado waara oo loo abuuro dhallinyarada Soomaaliyeed.
Wafdiga waxaa ka mid ahaa Maareeyaha Guud ee Dekedda Muqdisho, Danjire Maxamed Cali Nuur (Americo), Agaasimaha Guud ee Dekedaha Soomaaliya Cabdulqaadir Xaaji Xasan (Gureey), Prof. Khalid Macow, Safiir Ku-xigeenka Soomaaliya ee Talyaaniga Cabdullaahi Hamud, iyo Wasiiru-dowlihii hore ee Xafiiska Ra’iisul Wasaaraha Xukuumadda Federaalka Soomaaliya.
