Fiye da mutum 3,000 ne suka mutu a ƙoƙarinsu na kaiwa Spain ta teku a shekarar 2025, in ji wani sabon rahoto, abin da ke nuna babbar raguwa ta yawan mutanen idan aka kwatanta da watanni 12 na baya.
Kungiyar sa-kai ta NGO Caminando Fronteras ta ce mutum 3,090 sun nutse tsakanin Janairu da 15 ga Disamban 2025, ciki har da mata 192 da yara 437.
Wadanda suka mutun sun fito ne daga ƙasashe 30, kuma mafi yawansu daga Afirka ta Yamma da Arewacin Afirka, da Pakistan, Siriya, Yaman, Sudan, Iraƙi da Masar.
Masu fafutuka sun yi gargaɗi cewa raguwar mutuwar ba ta nufin tafiye-tafiyen sun zama masu aminci; maimakon haka suna cewa tsauraran matakan kan iyaka sun tilasta wa 'yan cirani shiga hanyoyi masu ƙarin haɗari.
Rahoton ya gano cewa tsallaken Atlantika daga Arewacin Afirka zuwa Tsibiran Canary ya ci gaba da zama hanyar da ta fi haddasa asarar rai, inda aka samu mutuwar mutane 1,906 a wannan shekara. Tafiyar na iya ɗaukar har zuwa kwanaki 12 a teku.
An ga ƙaruwar 'yan gudun hijira marasa izini sun yi ƙoƙarin bin hanyar daga Aljeriya zuwa Tsibiran Balearic, inda mutane 1,037 suka rasa rayukansu.
Caminando Fronteras ta jaddada bayyanar sabon hanya daga Guinea zuwa Tsibiran Canary, tana nuna ƙaruwa a haɗarurrukan da mutane ke fuskanta yayin ƙoƙarin kaiwa Spain ta teku.
Rahoton ya kuma soki abin da ya kira tsauraran manufofin hijira a duniya a shekarar 2025, tare da mayar da hankali musamman kan Amurka.
A cewar rahoton, manufofin korar ‘yan cirani da Amurka ke jagoranta sun taimaka wajen ƙirƙirar wani tsarin da ke mayar da korar zuwa ƙasashe marasa ƙarfin tattalin arziki, a wasu lokuta wanda ya sa masu ƙaura suke zaune a kurkuku, cikin wani halin rashin tabbas na shari'a, ko ma a sansanonin sojojin Amurka a ƙasashen waje.
Kungiyar ta ce irin waɗannan ayyuka suna koyi da manufofi da aka ɗauka a wasu wurare, ta ambaci shirin Birtaniya na korar masu neman mafaka zuwa Rwanda — wanda daga bisani Kotun Koli ta Birtaniya ta dakatar — da kuma yadda Italiya ta samar da cibiyoyin tsare mutane a Albania.
