Rais wa Uturuki, Recep Tayyip Erdogan, amesema kwamba Ukanda wa Gaza unahitaji sana kupona na kujengwa upya, akisisitiza juhudi za Uturuki kuhakikisha kuwa makubaliano ya sasa kati ya Hamas na Israel yanachangia kuleta amani ya kudumu.
Akizungumza katika Kongamano la 5 la Biashara na Uchumi kati ya Uturuki na Afrika, lililofanyika Ijumaa mjini Istanbul, Erdogan alisema: “Kutokana na historia mbaya ya Israel, bado tunakuwa waangalifu, kwani Gaza inahitaji kupona na kujengwa tena kwa haraka.”
Erdogan aliongeza kuwa Uturuki inafanya juhudi kubwa kuhakikisha kuwa makubaliano kati ya Hamas na Israel yanadumu na kufanikisha amani ya kweli.
'Kukomesha umwagaji damu' Sudan
Kuhusu mgogoro unaoendelea nchini Sudan, Erdogan alisema Uturuki inasikitishwa sana na mapigano yanayoendelea nchini humo, na alieleza matumaini ya kupatikana kwa usitishaji vita na amani ya kudumu.
Erdogan pia alisisitiza kuwa jumuiya ya kimataifa haijatoa kipaumbele cha kutosha kwa janga la Sudan, akieleza kuwa “Kukomesha umwagaji damu ni wajibu wa kibinadamu kwa kila mmoja wetu.”
Aliongeza kusema: “Kwa bahati mbaya, dunia ya Magharibi inaona vita vya wenyewe kwa wenyewe, migogoro, na mizozo barani Afrika kama hatima ya bara hilo.”
Tangu Aprili 2023, mapigano kati ya jeshi la Sudan na kikosi cha wanamgambo wa RSF (Rapid Support Forces) yamesababisha vifo vya watu zaidi ya 20,000 na kuwalazimu takriban watu milioni 15 kuyakimbia makazi yao, kulingana na Umoja wa Mataifa na mamlaka za ndani, huku utafiti wa vyuo vikuu vya Marekani ukikadiria idadi ya vifo kuwa karibu 130,000.
